(CNET) – Cu tres palabra, ‘Starship fully stacked’, fundador di SpaceX, Elon Musk ta mirando su vision di futuro bira un realidad.
Diabierna ultimo, Musk a comparti potretnan di un prototipo di astronave Starship y e raket Super Heavy hunto riba un plataforma di lansamento, cu e parti poderoso abao y e parti di punta pariba.
Musk anteriormente a post imagennan di e raket Super Heavy – un behemoth di 29 motor cu tin meta pa hiba Starship den un vuelo di test den orbita pa prome biaha – riba e plataforma na e facilidad di desaroyo di SpaceX na Boca Chica, Texas.
Coleccion di potret di Musk ta mustra e astronave Starship siendo eleva riba e raket Super Heavy y poni na su luga. E par ta alcansa casi 122 meter di haltura.
Na momento cu a puntr’e con ta sinti pa mira e combinacion espacial completamente arma, Musk a contesta riba Twitter: “Un soño a bira realidad.” E fundador di SpaceX a calcula cu por dura dos siman pa pasa door di un lista di pendiente, incluyendo e instalacion di mas tegel di proteccion di calor riba Starship.
SpaceX ta bin conduciendo un serie di vuelonan cortico di test na Texas cu prototiponan di Starship, algun di cual a sobrevivi e proceso, y otronan a rementa. E Starship orbital ta bay ta e test mas ambicioso te awo, y e prome cu e raket masivo Super Heavy necesario pa lans’e den espacio.
Un fecha di lansamento pa e vuelo test no ta poni ainda, y ta bay depende riba cantidad di factor, incluyendo termina e trabao riba e Starship y e Super Heavy, ademas di ricibi aprobacion di Administracion Federal di Aviacion Mericano.
Manda Starship den orbita ta bay ta un stap grandi den direccion di realisacion di e soño mas grandi ainda di Musk: transporta humano na Luna y Mars.
