(AP) – Den bista di e variante delta y su plamamento den Merca, un cantidad cu ta creciendo di colegionan y universidadnan ta pidiendo prueba di vacunacion contra COVID-19 pa studiantenan por atende les den persona na scol. Pero e mandatonobo a habri e porta pa e personana cu ta opone na e vacuna pa por gana e sistema, segun entrevistanan cu studianenan y oficialnan di educacion y ley.

Ambos empleadonan y studiantenan na varios scol a ser entrevista pa The Associated Press y nan ta bisa cu nan ta concerni cu con facil e ta pa ricibi un carchi di vacunacion falso.

Rond di internet, un industria a sali pa acomoda personanan cu nan no ta bay vacuna sea pa motibonan personal of religioso.

Un cuenta riba e red social di Instagram cu e usuario “vaccinationcards’ ta bende carchinan lamina di prueba di vacunacion contra COVID-19 pa 25 dollar cada un.

Un usuario ariba di e aplicacion protegi Telegram, ta ofrece “Covid-19 Vaccine Cards Certificates”, pa 200 dollar cada un. “Esaki ta nos mesun manera di salba mas hende cu nos por di e vacuna venenoso aki,” e mensahe di e bendedo ta bisa, cual ta ser mira pa por lo menos 11,000 usuario di e aplicacion.

E cifra ta aumentando pa cu e interes di e sitio nan aki, y otronan similar ta keda aparece di ta di e personanan cu ta purbando di ricibi un carchi falso di vacunacion pa por bay scol.

Un usuario di e sitio web Reddit, a comenta riba un serie di publicacionnan tocante e falsificacion di e carchinan di e vacuna di COVID-19 bisando de parti “Mi mester uno tambe, pa scol. Mi no ta bay ta un rata di laboratorio pa nan test riba mi.”

Riba e red social di Twitter, un usuario a cu mas di 70,000 siguidonan a publica “mi yiu a cumpra 2 carchi di identificacion falso online pa 50 dollar ora cu e tabata den scol. Treci for di China. Algun di boso tin e informacion di unda mi por haya carchinan pero di vacuna?”

Segun un conteo haci pa The Chronicle of Higher Education, por lo menos 675 colegio y universidad awo ta pidi pa prueba di vacunacion contra di COVID-19. E proceso pa confirma vacunacion na hopi di e scolnan aki ta un proceso simpel di subi un ptoret di e carchi di vacuna na e sitio web di studiante di e scolnan.

Na Nashville, Vanderbilt University a pone un pausa na e registracion di studiantenan te ora cu nan record di vacuna ser verifica, almenos cu nan tin un acomodacion aproba sea pa motibonan medico of excepcion religioso.

E University of Michigan a bisa cu e tin un sistema den luga pa confirma vacunacion di empleado y studiante. Un vocero di un di e scol a conta The Associated Press cu e scol te ainda no a haya algun problema cu e studiantenan falsificando nan carchi di vacunacion di COVID-19.

Pero Benjamin Mason Meier, un profesor pa e polisa di salud global na University of North Carolina na Chapel Hill, ta cuestiona con e institucionnan por verifica e recordnan aki.

“Merca, no manera hopi di e otro paisnan unda cu nan tin sistema electronico den luga, ta basando su vacunacion riba di un carchi di papel cu ta hopi fragil.”

Meier a publica riba di e red social twitter siman pasa cu el a papia cu varios studiante ken tabata preocupa tocante e accesibilidad di carchinan di vacuna fraudulento y cu nan conoce un studiante cu a somete uno na e universidad.

“Tin mester di polisa den vigor pa responsabilidad, pa asina sigura cu tur studiante ta operando den e interes general di henter e scol,” Meier a expresa.

Den un declaracion pa The Associated Press, UNC a bisa cu e ta conduci verificacion periodico di e documentonan y cu e fraude di e carchi aki of ganamento tocante e status di e vacuna ta un violacion di e scol su reglanan di comunidad pa cu COVID-19 y por resulta den accion disciplinario.

“E ta importante pa nota cu UNC-Chapel Hill no a haya ningun instancia di un studiante publicando un carchi di vacuna falsifica. E declaracionnan aki ta simplemente un ganamento,” e scol a declara.

Pero otro universidadnan su empleadonan y facultad a expresa nan preocupacion tocante e fraude pa cu e vacunacion aki. Rebecca Williams, un investigado associa na UNC su Lineberger Comprehensive Cancer Center y Center for Health Promotion and Disease Prevention, a bisa cu mientras cu e ta sorprendi pa e hechonan aki, e no ta sorprendi.

“Esaki ta e motibo dicon mi ta kere cu e desaroyo di un aplicacion nacional confiabel digital como paspoort di vacuna ta hopi importante pa e bienestar di tur e negoshinan y organisacionnan cu kier pidi prueba di vacunacion pa empleadonan, studiantenan, of clientenan,” Williams a expresa.

The Associated PRess a papia cu varios diferente studiante den henter e nacion cu no tabata kier ser identifica, pero a bisa cu nan ta al tanto di e intentonan cu tin pa obtene carchinan falso.

Algun oficialnan di e scol ta admiti cu un sistema unda cu no tin chens di fayo ta imposibel.

“Mescos cu mayoria di e cosnan cu ta rekeri un certificacion, tin e posibilidad pa un individuo falsifica documentacion,” segun Michael Uhlenkamp, un vocero pa California State University. E sistema di e scol, cual ta esun mas grandi den e nacion, ta encarga di mas o menos 486,000 studiante, den 23 diferente localidad.

Dr. Sarah Van Orman, e hefe di salud na University of Southern California y COVID-19 su miembro di task force pa e American College Health Association, a bisa cu e scolnan ta specialmente dificil pa por controla e plamamento di COVID-19 pa motibo cu tin miles di studiante cu ta bin biba na e scol di diferente parti di mundo. Pero te hasta si e studiantenan falsifica nan status di vacunacion, esaki por tin tiki impacto.

“Mi ta kere cu e cantidad di studiantenan cu lo haci esaki ta asina chikito cu e no lo afecta nos habilidad di por ricibi un inmunidad general den nos comunidad,” Orman a declara.