Den un recorido cu reportero di Bon Dia Aruba a haci, a yega di a conta aproximadamente 11 dump ilegal na e area di Butucu y den vecindario di Palo Marga.
Ta parce cu te ainda tin ciudadanonan cu no solamente ta compronde cu Aruba tin otro problema mas grandi como esun di Covid-19 na e momentonan aki, pero sushi ta keda como un problema di conscientisacion pa henter comunidad.
Di mesun manera a mira con ciudadano ta transporta sushi y otro tipo di desperdicio cu despues a wordo tira den area di Butucu, te hasta por a mira asbesto tira den mondi causando efectonan dañino pa e medio ambiente.
E material cu ta contene asbesto cu ta keda bandona den e dumpnan ilegal aki tin fibranan y stof di asbesto mes cu no ta disolve y ta keda den aire y awa cu na final por causa cancer na pulmon.
Tambe banda di Palo Marga basta tire, pañanan, papelnan, sofa, desechonan cu a wordo saca di un cas y benta akinan como si fuera cu esaki ta e miho luga pa tira sushi y causando molestia y daño na medio ambiente.
Ayera dialuna Nacionnan Uni a adverti riba un rapport nobo di e Grupo Intergubernamental di Expertonan pa Cambio Climatico (IPCC) na unda nan a señala cu tin “codigo cora pa humanidad” y ta enfatisa riba e tuma di medidanan mesora pa asina pone un stop na calentamiento global.
Aruba ta un isla turistico hopi bunita mes cu diferente luganan y paisahenan, ban sigui cuida nan y percura pa cu desperdicionan y sushi lo bay na su luga cu ta e dump di Parkitienbos y no esunnan ilegal cu tin efectonan dañino pa e pida di baranca aki.
