(DutchNews.nl) – Tur ocho miyon hogar na Hulanda e luna aki ta bay ricibi un carta invitando nan pa aplica pa dos test propio di coronavirus gratis, e prome di cual ta programa pa yega e siman aki. E carta, cu ta disponibel den varios idioma, ta parti di un campaña nacional pa pone mas hende haci un test riba nan mes na momento di bolbe for di vakantie of prome cu bay back trabao of scol.
“Mi ta spera cu hopi hende ta bay test nan mes den futuro cercano prome cu top cu otronan”, minister di Salud, Hugo de Jonge, a bisa. “Door di haci test, nos ta reduci e probabilidad cu sin sa nos ta hiba coronavirus na nos famia, trabao of scol, y ta preveni clusternan.”
Trahadonan di hunta regional di salud (GGD) tambe ta bay parti testnan gratis na hende cu ta bolbe for di Hulanda na tur cinco aeropuerto. Studiantenan por ricibi test gratis na nan universidad of scol, mientras hogarnan di menos recurso por ricibi mas test via donacionnan di gobierno of banconan di cuminda.
Hende cu ta ricibi un resultado di test positivo cu e test propio, ta urgi pa haci un di dos test PCR na e centro di test di e hunta regional di salud.
Trouw a reporta siman pasa cu e gran mayoria di e 38 miyon rapidtest di coronavirus cu ministerio di Salud Hulandes a bestel ainda ta den almacenahe, y solamente a usa seis miyon.
E testnan di ministerio di Salud ta ser usa principalmente den ‘test pa entrada’, cu awo ta enfoca riba eventonan sinta solamente, despues di e decision pa elimina tur festival y otro eventonan grandi te cu al menos september. Y ta keda duda si lo usa nan tur prome cu nan caduca, segun e corant.
