(AP) – LIV ta ofreciendo vacunanan contra COVID-19 gratis pafo di South Beach su nightclubnan mas glamuroso, unda cu e personanan ta gasta te hasta 20,000 dollar solamente pa un mesa.
E clubnan aki unda cu campeonnan di Super Bowl sa celebra na fiestanan asina grandi cu nan sa inspira letranan pa e canticanan di Drake y Kanye West, a organisa un sitio unda por ricibi vacuna di COVID durante e weekend na LIV y Club Story pa asina por motiva e pueblo mas hoben pa ricibi nan vacuna den bista cu nan ta e grupo cual ta yenando e hospitalnan den Florida pa causa di e variante delta.
E ‘Sunshine State’ a yega un record nobo durante e weekend. Riba diasabra e U.S Centers for Disease Control and Prevention a reporta 23,903 casonan nobo di COVID-19 pa diabierna. Esaki ta subi e record di e dia anterior cual tabata 22,783 caso nobo.
Clubnan manera LIV y Story a ser cera pa mas o menos un aña durante e pandemia y a bolbe habri den april. E doño David Grutman, e rey di South Beach su escena di clubnan, ken tambe ta dono di un restaurant y hotel cu Pharell a bisa “Nos ta emociona, nos kier keda habri, y nos sa cu e unico manera cu esaki por tuma luga ta si hendenan ricibi nan vacuna, y pa motibo aki nos kier haci esaki lo mas accesibel cu ta posibel.”
David a traha cu CDR Health, cual a administra mas di 2 miyon vacuna desde e brote, pa ofrece vacunanan gratis pafo di e club durante e weekend, cu e posiblidad di extende esaki pa algun fin di siman adicional.
