Di un hoben cu a lanta ta pisca pa hobby, awe Jesse Rasmijn ta un ambientalista extraordinario cu kier inspira mas Arubiano descubri e bunitesa di naturalesa. Y awor e ta bayendo mas leu, e kier combina su amor pa naturalesa cu activismo pa sigura cu costanan di nos pais ta keda limpi.
Jesse Rasmijn ta un diseñador grafico kende te cu menos di dos aña pasa, tabata practicamente adicto na piscamento. No necesariamente e acto di piscamento mes, sino e esfera di ta sinta den un boto, pa oranan largo, sin mester intercambia palabra y djis aprecia e silencio cu e zonido di olanan di lama ta dal riba e boto tabata kibra. “E tabata casi un adiccion, mi tabata keda oranan na lama. Bo por bisa cu mi tabata un beachbum, pasobra mi tabata laga tin biaha hasta mi trabao un banda pa subi lama.” El a dicidi pa tuma fotografia como hobby pa asina busca mas opcion y kibra un poco di e adiccion pa lama y su bida a cambia y den proceso, cambia bida di hopi otro.
Eric y San Nicolas
Jesse a pasa man pa su camara como fotografo nobo y a cuminza saca potret di e bario cu e ta stima, San Nicolas. Tabata un potret cu el a pone riba Facebook di San Nicolas cu a capta atencion y curazon di un cantidad di hende. E potret tabata di rayonan di solo saliendo tras di Misa Santa Theresita y e fenomeno di Jesse, e fotografo di paisahenan fabuloso a nace. For di potret di St. Christoffelberg na Corsou for di Ser’i Cabay den Parke Nacional Arikok, te potretnan comercial cu el a cuminza saca, Rasmijn a bira un inspiracion pa hopi.
Pero kizas e por a bira un inspiracion pa hopi pasobra e mes a siña conoce su mes danki na un persona cu te ainda ta influencia su filosofia di bida. Jesse a lanta cu Eric Nassy, kende tabata e pareha di su mama. Nassy tabata un hende dedica den e lucha contra adiccion di droga na Aruba, y ademas, tabata un hende cu tabata kere den e potencial di San Nicolas, unda el a lanta y muri. E morto di Eric Nassy na 2020 a impacta Aruba, pero tabata su educacion na Jesse, ta locual ta tene su filosofia bibo. “Prome cu Eric a bay, el a siña mi cu ‘conoce bo mes ta e comienzo di sabiduria.’” Y pa tal motibo mes, cu cada potret cu Jesse ta comparti, e ta agrega un texto filosofico cune, un pensamento expresa den palabra pa duna su potretnan mas contenido. “Mi mama y cu mi ta sinta hunto y bin cu e frasenan aki. Asina nos ta purba sigui cu locual Eric a laga atras. El a siña mi hopi.”
Expande pa mondi
Pa cada potret cu Jesse a publica di San Nicolas, e tin un cantidad cu el a saca y no a comparti. Esey ta tipico di cada fotografo cu kier documenta bida. Y cierto momento, el a ripara cu e kier saca mas di locual tin rond di dje. Ta e momento ey, el a drenta mondi y asina Jesse a bira un hende cu ta explora e naturalesa duro, pisa, pero extremadamente emocionante di Aruba. Un mondi cu kizas pa hopi no ta mustra nada, pero cu ta brinda rikesanan enorme si dicidi pa confronta e hubada, e tuna, e bringamosa. “Ami mes como mucha no tabata conoce mondi. Nos no a lanta ta aprecia mondi. Y mi kier trece cambio den esey.”
Unabes cu Jesse a descubri mondi, el a haya su mes den un otro mundo. Un mundo unda e mata, e insecto, e cascabel pero particularmente henter e paisahe a cuminza papia cune y el a respond’e pa medio di su potretnan. Y asina a cuminza hiba hende cune riba su descubrimento di e Aruba cu mas a conoce durante e pandemia en particular, pero hopi mas hende mester siña aprecia ainda.
Recien, Jesse hunto cu otro amigo, Shanon Croes, kende tambe ta guia gruponan den naturalesa di Aruba, a dicidi pa bay Costa Rica, e mecca pa hendenan cu ta kier e ‘pura vida.’ Costa Rica ta famoso pa su afan pa proteha su naturalesa y e experiencia di ambos a ilustra cu na Aruba tin hopi pa haci. Costa Rica ta grandi y berde y Aruba ta chikito y seco, desierto. Pero esey no ta nifica cu no tin skinanan desconoci, y no tin areanan natural espectacular cu merece admiracion, pero particularmente proteccion.
Sushi no ta di mi, pero Aruba ta mi isla
Rasmijn kende a sostene un actividad di limpiesa na area di Bushiribana siman pasa, ta preparando pa otro accion dia 21 di Augustus, unda ta combina e actividad di ‘hike’ pa despues haci parti di e ruta limpi, e biaha aki pa ora di caida di solo. Aunke mayoria di e sushi cu lama ta trece ta procedente di Sur America pa medio di corientenan di lama, “e no ta nos sushi, pero Aruba ta nos isla,” cu ta e enfoke di su dedicacion pa preservacion di nos pais. Y como persona cu awor ta haya pago pa su potretnan, den e skinanan mas bunita di Aruba, e ta kere cu otronan cu ta gana nan placa danki na naturalesa di Aruba, manera operadornan di tour, mester siña conoce, aprecia y proteha nan isla miho, y siña nos bishitantenan cu nan tambe tin un papel pa hunga pa proteha medioambiente y ecologia di Aruba. Pasobra di e forma aki tur por contribui cu nos pais ta sigui e isla cu tur ta bisa di ta stima.
E hoben cu tabata medita den boto riba lama en realidad no a cambia. Numa cu su pensamentonan awor ta expresa den su potretnan, su dichonan y den su pasion pa stimula mas Arubiano conoce, respeta, stima y proteha e naturalesa di Aruba. Y manera su tata di alma a mustr’e, “spera di por sigui pusha Aruba y San Nicolas, manera e tabata haci. Y pa mi ta e homber cu semper Eric Nassy tabata kier pa mi ta.”
