President di Fundacion Diabetes Aruba, Dr. Sharline Vis a splica durante un entrevista cu Bon Dia Aruba, kico e enfermedad diabetes ta encera, e retonan cu enfermedad ta trece cune, e causa mas comun pa e enfermedad y tambe kico e mision di curso PRISMA pa diabeticonan ta.

Diabetes ta un enfermedad cu ta trece cune su retonan y dificultadnan, pero ta un enfermedad cu ta por wordo maneha y preveni si tin e estilo di bida adecuado. Dr. Vis ta splica con e diabetes tipo 1 ta afecta e curpa en realidad y kico e causa mas comun di e tipo di a diabetes aki ta.

“Diabetes tipo 2 ta eigenlijk un tipo di diabetes cu tin di haber hopi cu e estilo di bida.

Ora nos estilo di bida ta for di balansa bo ta wak hopi biaha cu esey tin di haber cu menos comemento saludabel y usamento di productonan cu no ta bon pa e salud, y e tin di haber tambe cu movecion, cuanto ehercicio nos ta duna e curpa”, Dr. Vis a bisa.

“E hormona insulina ta regula sucu y ta zorg pa e sucu drenta e celulanan di nos organonan pa produci energia pa e organo traha. Ora e insulina no por haci su trabou bon, e ora ey nos ta wak cu e sucu ta cuminsa subi den e sanger. Nos ta haya diabetes door cu e curpa no ta usa insulina adecuado mas. Ora cu tin obesidad, e vet ta traha hormona anto e hormonanan ey ta blokia e portanan, e receptornan, dus e celula no ta habri pa e glucosa drenta y ora ey e glucosa ta keda den e sanger”, el a agrega.

Dr. Vis ta splica cu a diferencia di diabetes tipo 2, caminda ainda tin insulina ta wordo traha den e curpa, diabetes tipo 1 ta ora cu e pancreas di un persona ta stop di traha completamente y no ta produci nada di insulina mas. “E pancreas ta stop di traha paso e sistema inmunologico ta kibra e celulanan cu ta traha insulina, dus diabetes tipo 1 nos ta yam’e un autoimmune disease”.

E causa mas comun pa diabetes tipo 2 a obesidad, y segun Dr. Vis pa emotivo aki e edad promedio pa diagnostica diabetes tipo 2 ta 45 aña, pero e ta bisa tambe cu den actualidad casonan di diabetes tipo 2 den pashentnan mas jong ta birando mas frecuente. “Nos ta bezig ta wak casonan di diabetes tipo 2 mas frecuentemente den adolescente y adultonan hoben, ban bisa 25 aña bay ariba, pero tin algun hende bo ta wak e caba na edad di middelbare school, 16 aña bay ariba”, el a bisa.

“Nos mester ta hopi cauteloso paso tin un gran cantidad di mucha for di kleuter caba bo ta wak cu ta sobrepeso caba. E cos mas importante ta pa siña e muchanan for di chikito, con pa come saludabel, pa come mas productonan cu fibra y tambe wak e cantidad cu bo ta come tambe. Mester siña e muchanan cu movecion ta importante tambe, principalmente den e mundo moderno cu tur cos ta tablet y telefon, e muchanan ta sinta hopi mas paden en bes di hunga pafo of haci un sport”, el a agrega.

Dr. Vis ta splica cu diabetes tipo 2 por ta reversibel tambe. “Dependiendo di con bo adapta bo estilo di bida na uno saludable y bebiendo e remedinan necesario, e por ta reversibel. Pero bo mester tene na cuenta cu un persona cu semper bo lo ta vulnerabel pa e enfermedad regresa. Dus bo no por bay biba a vida loca despues cu bo cura paso e por regresa”, el a bisa.

Dr. Vis a papia tambe tocante e programa PRISMA (Proactive Interdisciplinary Self-Management) cu Fundacion Diabetes Aruba a introduci na aña 2019. E programa PRISMA ta a comproba su eficacia na Hulanda, na Inglatera y e ta un programa cu ta enfoca ariba e maneho propio di cada pashent. “Nos ta train e pashent e ora den kico e por haci su mes. Nos ta enfoca no solamente pa educa e hendenan kico e malesa ta, pero nos ta enfoca tambe ariba kico ta un estilo di bida saludabel”, Dr. Vis a bisa. “Nos ta bin cu weganan interactivo cu e hendenan lo haya un idea cua te productonan saludabel, y nos ta enfoca tambe ariba movecion, kico hende por haci pa move y keda activo”.

“Despues full na final nos ta enfoca ariba con pa traha un plan, pa cada persona individual segun e problemanan of retonan cu e persona ey ta encontra, paso bo tin cu yuda e hende pa setup un plan cu ta un ‘smart plan’ pa trece un cambio den nan estilo di bida segun loke nan tin mester ayudo cune”, Dr. Vis a agrega.

E fundacion a cuminsa cu e programa PRISMA prome cu e pandemia di COVID-19 a cuminsa y na februari mester a stop. Dr. Vis ta bisa cu; “e tabata un prueba y nos a haci investigacion cu tur hende cu e participa, y e investigacion tabata exitoso entre e personanan cu a participa”. Recientemente e fundacion a habri inscripcionnan y cuminsa atrobe cu e cursonan di e programa.