Den un entrevista cu Josephine Albertus, president di SIMAR, e ta splica e motibonan y e preocupacionnan di mas importante cu e sindicato tin pa locual ta e situacion cu WEB Aruba NV, unda cu e la dicidi di manda un carta pa Minister President demisionario dos dia pasa pidiendo claridad y informacion concreto.
Tumando nota di e desaroyonan recien alrededor di e situacion di WEB Aruba NV y mirando e situacion alarmante cu Aruba ta aden financieramente, Sra. Albertus a manda e carta pa Minister President pidiendo claridad ariba e situacion confuso aki. “Den prensa bo ta scucha un dia cu tur cos ta bayendo bon, despues bo ta scucha cu no tin confianza mas den e directornan, despues a scucha cu no, nan a wordo retira y nan a haya e ‘golden handshake’ y despues a bisa cu nan mes kier a retira, pero en todo caso nan mester a wordo paga”, Sra. Albertus a bisa.
“Pa nos loke tabata alarmante ta cu e situacion cu nos ta aden aworaki financieramente ta hopi precario, enseñansa tin decadanan sin nada no ta wordo haci. Aña pasa mes den e recorte e placa a wordo usa pa fase, cu nos no tin problema pa haci esey paso si wordo bisa cu nos ta den un situacion precario, nos tambe ta solidario, nos yuda. Pero si di otro banda bo ta wak cu nan ta dunando golden handshake, e ora ey ta un duda si ta asina berdad”, el a splica.
No ta un secreto cu e situacion financiero di Aruba ta preocupante. Sra. Albertus ta cuestiona e ‘golden handshake’ cu a duna e directornan di WEB mirando cu tin incertidumbre den diferente otro sectornan, manera enseñansa y cuido medico. “E werksternan di SKOA ta den incertidumbre, y AZV a sali e siman aki bisando cu e 60 miyon di recorte a trece hopi reto cune paso awo no tin claridad mas si ta manda hende afo si of no, y e calidad tambe ta bay wordo perhudica asina den cuido”, Sra. Albertus a indica.
“Ainda tin ayudo humanitario cu ta wordo duna, paso Cruz Cora no ta dun’e mas, pero gobierno a tum’e over anto e ora ey Fundacion pa Nos Comunidad ta esun cu ta brinda e ayudo y ainda tin hende den fase, tin dunado di trabao cu ta haya subsidio di salario. Dus e ora ey nos a bisa, e no ta corecto cu na un banda bo ta bisa nos ta den situacion precario, tin hopi cosnan cu no por wordo haci y na otro banda bo ta tende cu tin ‘golden handshake’”, el a agrega.
Sra. Albertus ta splica tambe cu nan miembronan di veld cu ta yama bisa cu ainda nan ta entregando 12.6%, cu ta te proximo aviso paso no tin placa y na otro banda tin e golden handshake; “mirando e situacion aki e ta bira pa mi dificil pa mi bisa nan, bo sa kico, e luna aki bo back to school premie, asina nan ta yam’e, ta bin 50%, pero na otro banda si, e mesun luna, tin golden handshake ta wordo duna. Ken ta bay financia esaki, ta pueblo lo tin cu paga pe, con e ta bay ta paso nos no por ta cortando un caminda anto bisando cu e situacion ta precario y na otro banda tin placa pa duna asina ey”.
Sra. Albertus ta splica tambe cu e situacion cu e werksternan di SKOA, cu ainda no a yega na un solucion, ta hopi lamentabel. E werksternan tin mas di 18 luna den e situacion di incertidumbre aki y no tin claridad ariba kico lo bay pasa, mirando cu scol lo cuminsa aki dos siman e ta importante pa cada alumno y persona laborando na scol, mester por drenta den un scol limpi na unda ta tene cuenta cu higiena, seguridad, salud y bienestar.
“SKOA ta encera 46 scol, cu ta hopi scol y mirando awo tambe cu e casonan covid, e ta subiendo, bo mester claridad paso nos ta wordo yama cada biaha door di maestro puntrando kico ta bay pasa y loke mi por bisa si cu ainda no tin claridad riba dje, ainda nan ta bezig y e ta hopi lamentabel pa wak. P’esey atrobe mi ta bisa, no por regel e cosnan di SKOA cu ya caba tin mas di 18 luna ta andando y ta yega aworaki brinda golden handshake na algo cu awo a cuminsa, cu no dura un luna anto bo tin e werksternan ya caba mas di 18 luna den incertidumbre. Dus nos ta puntra nos mes, unda e prioridad di gobierno demisionario of con cu bo mir’e, ta”, Sra. Albertus a agrega.
SIMAR a ricibi for di crisis team un protocol, cu ya caba tabata vigente na april, pero te cu aworaki no a ricibi ningun instruccion of protocol adicional, por ehempel si scol lo no habri of si lo habri na 50% di capacidad. Loke Sra. Albertus a bisa ta cu nan lo vigila y percura pa na momento cu scolnan habri, pa e situacion na scol ta uno responsabel na unda ta tene cuenta cu e salud, seguridad y bienestar di esunnan laborando y di e alumnonan y di e mayornan tambe.
Por ultimo Sra. Albertus ta bisa tambe cu si e situacion di e werksternan di SKOA no tin un solucion rapido, esaki lo tin consecuencia grandi pa e sector di enseñansa. “E ora ey nos ta bisa cu si bo no por brinda seguridad di salud cu ta bisa cu mester haci e scol limpi, e ora no por tin scol. E ta duro pero asina e ta paso nos no por manda alumno y maestro scol y e scol no ta wordo haci limpi anto mirando e casonan ta subiendo asina, e werksternan ta esencial pa e parti aki, dus nan mester t’ey y p’esey mester bin cu un solucion prome cu scol habri”.
