Asina a expresa Benny Sevinger ayera den oranan di atardi na momento cu e tabata dilanti di Cas di Gobernador, pa duna un declaracion tocante su huramentacion como parlamentario, den e cual el a keda eligi cu votonan preferencial dia 25 di juni ultimo.
Sevinger, kende a sali for di prizon algun dia atras, a expresa cu el a nace den un cas cu ta kere cu nada no ta sucede por nada. “Cu Dios sa kico e ta haci y kico ta e caminda cu ta pone pa cada un di nos cana”, el a sigura.
Di mesun manera, el a trece dilanti cu ayera nan a duna un paso importante den e democracia di e pais aki. “Un paso cu no tabata facil pa yega akinan. Un persecucion cu a cuminsa añanan anterior, den tempo cu mi tabata minister, cu a concretisa den investigacion y persecucion fisicamente na 2018 cu e entrega di un keho di partido MEP na Ministerio Publico. Un keho cu nan a pone presion te ora cu nan por a dicidi di haci algo te cu a bay na mi cas, te cu a bay na detencion di mi persona den pleno campaña”, el a afirma.
Igualmente el a menciona cu no ta por nada cu el a wordo deteni y cu na e momento cu e por papia di esey, e lo splica den detaye con esey a sucede, pakico esey a sucede y kico tabata e intencion; cu e no ta nada otro cu un politico no a participa den eleccionnan ultimo.
“Mi no ta bay wanta secreto pa e comunidad aki” el a sigura.
Acompaña di su casa Claudia Sevinger y su yiu homber, Benny Sevinger a asisti na su huramentacion na Cas di Gobernador, na unda su siguidonan tabata wardando p’e pa celebra e acto aki.
Potret: © Kabinet Gouverneur Aruba
