Argentina ta habri parcialmente danki na caida den infeccion di COVID -19

(AL JAZEERA) –Argentina lo relaha e restriccionnan di coronavirus awor cu cantidad di caso di infeccion y mortalidad ta bahando. Gobierno a anuncia e decision ayera, a pesar cu e pais ta yegando cinco miyon caso di infeccion y mas di 107 mil morto, riba un populacion di 45 miyon hende.

Gobierno a bisa cu su plan ta inclui un incremento den e cantidad di persona cu por reuni cu otro, habri scolnan y permiti 1700 hende drenta Argentina pa dia, cu ta 700 mas cu ta e caso te cu awor. “Mas hende nos vacuna y cuida nos mes, mas nos lo por sostene e logronan aki y avansa den aperturanan sostenibel y progresivo,” Alberto Fernandez, Presidente di Argentina a bisa.

E cantidad di personanan cu ta tumando vacuna a aumenta den ultimo dianan despues cu a registra un crecemento den e transmision di e virus na Juli, memey di winter unda hendenan tin e custumber pa socialisa paden. Sinembargo, e plan pa reapertura a bin despues di 10 siman consecutivo di caida den cantidad di infeccion y ocho siman di caida den cantidad di morto.

E di dos fase di e plan ta depende di e grado di infeccion, y lo inclui un aumento di capacidad di hende den un espacio paden, atendencia ilimita pa eventonan den aire liber, y lo permiti gruponan vacuna biaha den pais. Den e di dos fase lo habri e frontera pa personanan stranhero cu ta completamente vacuna. E ultimo fase ta eventonan deportivo paden, pero unicamente si e casonan sigui cay, Fernandez a bisa.

Argentina a cuminza su programa di vacuna cu e Sputnik, e vacuna Ruso. Aunke cu inicialmente ta usa e vacuna Ruso pa henter e populacion, a bin retraso cu e di dos dosis. Como tal Argentina ta ofreciendo e di dos dosis di Moderna of e vacuna di AstraZeneca.

Minister di Salud Carla Vizzotti a bisa cu flexibilisacion di e tipo di vacuna cu ta duna lo yuda Argentinonan contra e variante Delta, y pa motibo cu Rusia ta tardando pa manda e suficiente dosis di Sputnik, a cuminza cu e intercambio di e diferente vacunanan cu ta disponible. Ayera a cuminza usa e vacuna di Moderna y AstraZeneca como e di dos dosis pa esnan cu a ricibi e prome di Sputnik, aunke cu nan ta usa tecnologianan diferente. Pero Autoridadnan di Salud Publico di Argentina e enfatisa cu a dicidi pa e combinacion despues cu cientificonan a haci e pruebanan necesario cu a ilustra cu e practica aki ta ofrece inmunidad similar.