Diaranson ultimo, mr. David Kock, abogado di politico di AVP, Benny Sevinger, a duna un entrevista na portal online NoticiaCla, den cual el a discuti topiconan relaciona cu detencion y libertad condicional di su cliente. Segun Kock, Sevinger ta implica den e caso pasobra otro personanan a ‘malusa su confianza’.

A cuminsa comentando cu maske a duna Sevinger libertad condicional, e ta keda un sospechoso den caso Avestruz. “Si, e ta keda sospechoso”, Kock a comenta. “Wak, diabierna siman pasa, mirando e desaroyonan den e caso nos a solicita dos cos: prome pa kita full e detencion, y si no, pa schors e.” E diferencia ta cu den e prome, ‘e detencion ta caba, e orden di detencion ta termina, y e no por bin back. Y tambe e ora Ministerio Publico no por pone ningun condicion’. Pero na momento cu ta pidi un schorsing, esta un suspension di e detencion, ‘e ta keda na bida, pero nos ta pone un rato un banda’, y ademas ‘ta pone cierto condicionnan’, y si no cumpli cu esakinan, fiscal por usa e mesun orden di detencion pa detene e sospechoso back. Kock a indica cu ta mas facil pa un hues suspende un detencion na lugar di cancela esaki, y ademas cu Ministerio Publico a dicidi di no bringa contra un schorsing, pero si insisti riba condicionnan. E restriccionnan cu a pone riba libertad di Sevinger ta cu ‘e no mag comete un otro delito; si hues mester cit’e, e mester aparece; y finalmente cu e no por tin contacto cu 15 persona cu ta envolvi den e caso’, kendenan ta co-sospechoso, segun Kock’. Kock a indica cu no a kita paspoort di Sevinger ni a pone condicion cu no mag di biaha. Ademas, tin cierto cosnan riba cual OM a pidi Sevinger pa no papia, maske esaki no ta un condicion pa su libertad.

Pa loke ta e caso, Kock a comenta: “Te ainda nos ta keda bisa cu sr. Sevinger no a comete ningun delito. Den nos opinion tambe no tin prueba ainda di delitonan cometi. Sí tin motibo suficiente pa investigacion, pero no pasobra tin investigacion kiermen cu tur persona cu ta wordo investiga ta bay wordo haya culpabel. Tin un grupo grandi di hende cu ta siendo investiga den e caso aki – tin par di nan muy probablemente sí a haci nan mes culpabel den e caso aki. Pero nos mester wak den interes di Sr. Sevinger.”

Contestando si den su opinion sí tin hende cu a comete delito den e caso, Kock a bisa cu ‘tin varios cos cu a sucede cu nunca no mester a sucede’. El a bisa cu ainda nan no tin bista completo, pasobra te ora cu ta bay presenta e caso na hues nan ta haya e dossier completo. Awor tin pida pida di e informacion pa loke ta trata e otro sospechosonan. Nan tin solamente informacion riba Sevinger.

A puntra Kock pakico, faltando tres siman pa cumpli e sesenta dia di detencion cu ya tabata aproba pa Sevinger, a pidi awor su libertad. Segun Kock, semper ta evalua desaroyonan den e caso. Detencion di Sevinger a bin riba peticion di OM ‘cu ta alega cierto cosnan’ y basa riba esaki hues ta dicidi si ta duna libertad of no. Mirando ‘cierto desaroyonan’ – cu segun Kock e no por duna detaye den publico actualmente – ‘nos a considera cu ta tempo cu un detencion no ta hustifica mas’ y nan no kier a warda tres siman pa bay hues. “OM ta haya informacion den nan investigacion cu no ta comparti cu nos.”

Riba comentarionan di Sevinger, indicando cu el a realisa cu bringa su caso ta bay tin dificultad, a puntra Kock si esaki ta a base di evidencia cu lo por incrimina Sevinger. “Loke tambe a bira cla ta cu el a confia hendenan rond di dje, den trabao, claramente su confiansa a wordo malusa”, el a comenta. NoticiaCla a purba di clarifica e ponencia di Kock, comentando si ta e caso cu hende rond di Sevinger a comete e delitonan sin cu e mes tabata involucra, cu a abusa di su confiansa. “A buen entendedor, pocas palabras”, el a comenta. El a aclara cu den e caso ta bay nota cu si a comete algun delito, pero riba ken ta bay pone e responsabilidad di esakinan ta bay bira e nucleo di e caso. Sinembargo, como minister, Sevinger lo tabata responsabel pa tur loke por a sucede den su ministerio, pues maske por a ‘malusa’ di su confiansa, toch e mester para responsabel pa e eventual delitonan den cual el a haya su mes involucra.

Ademas, Kock a bisa cu no tin hopi mas evidencia of acusacion a bin riba Sevinger desde su detencion. “Nos opinion den e caso aki no a cambia.” Manera nan ta para aworaki, Kock ta sigur cu su cliente ta bay sali inocente. Pero el a comenta sinembargo cu mirando cu nan no tin e dossier completo, nan no por descarta cu ta bay tin informacion cu por cambia su ponencia.

Nota di redaccion

Ta imaginable cu e expresionnan di e abogado di Sevinger lo causa reaccion di e otro implicadonan den e caso, aunke nan tampoco por reacciona publicamente. Interesante lo ta pa mira si den e tempo cu falta ainda pa e caso bin den Corte, Ministerio Publico por confronta e demas participantenan cu e manera cu e sospechoso principal a laga su abogado haci un limpieza total di su caso, tirando tur culpa riba e otro acusadonan, cu lo a haci mal uso di su confianza. Na cada ken e escogencia pa kere semehante splicacion.