Ayera atardi Biblioteca Nacional di Aruba a duna di conoce cu e aña aki ‘Festival di Buki pa Mucha’ lo ta na november y un biaha mas su version lo ta den forma virtual.

Asina a afirma Josmar Maduro-Sneek ken ta bibliotecario y coordinado di e Festival di Buki pa Mucha na unda el a informa cu e aña aki nan ta celebrando e di 29 aña di e festival aki.

Lo cual cu nan kier trece dilanti ta e promocion di lesamento, e festival ta e campaña anual mas grandi pa stimula lesamento cerca mucha di Biblioteca Nacional Aruba y e aña aki nan tin como tema ‘Ta loke bo kier ta’ cu e lema ‘Ora mi bira grandi, mi kier bira…’ pa asina e muchanan rond di Aruba por completa e frase aki basa den loke nan ta soña di nan profesion den futuro.

Pa cada aña 12 autor di buki pa mucha y ilustrado ta duna un contribucion na e proyecto anual di biblioteca na unda autornan di Hulanda, Corsou y Aruba ta participa, di parti di scolnan di Aruba e interes pa participa ta grandi y e presentacion lo haci den studio di biblioteca y lo sali via television na TeleAruba, via rednan social, scolnan y biblioteca mes.

Autornan y contadonan di cuenta cu biblioteca a invita e aña aki ta Lizzy van Pelt, Annmarie Jongbloed, Petra Heezen (Ilustrado), Jeroen Hoogerwerf y Evelien van Dort for di Hulanda, Mercee Doran y Tio Ali for di Corsou y di Aruba Robby Solognier (Ilustrado), Lorena Boekhoudt-Almary, Maribelle Arends, James Ocalia, y Sarah-Quita Offringa.

E festival ta cuminsa for di dia 8 te 12 di november segun Maduro-Sneek a informa cu scolnan lo participa di manera virtual igual cu aña pasa , e tambe a bisa cu e apertura mes di e festival lo ta dia 5 di november cu lo sali via television entre 6or pa 6or y mey, nan lo duna di conoce e ora precies despues.

Tambe, Maduro-Sneek a señala cu lo tin un tayer e aña aki cu tambe lo ta di forma virtual den cual Mirton Lacle ta encarga di esey hunto cu e presentador Richard Damian y Rosita Abreu.

Giselle Lacle miembro di comision di e festival y persona encarga di actividadnan di merdia na biblioteca a comenta cu nan a haya 50 buki di regalo for di nan sponsor mas grandi, scolnan cu no ta haya buki for di biblioteca como por ehemplo peuterschool y traimerdia e bukinan lo wordo reparti entre nan.

Di loke ta trata e actividadnan di merdia cu Lacle ta dirigi, esey ta wordo organisa for di 8 pa 11 di november y tambe lo wordo presenta via television, e actividadnan lo tin tur dia un autor presente y ta bay tin cierto scolnan no full, segun loke el a menciona.

E buki di e aña aki ta dirigi pa muchanan for di vijfde y zesde klas y te ainda nan no tin un nomber scogi pa e buki, nan lo duna di conoce mas dilanti ora nan lo ta yegando Aruba for di Hulanda.

Cada dia ta birando un reto pa muchanan por haci lesamento, por mira cu e generacion aki ta mas visual cu esun cu ta lesa y di esaki Maduro a expresa cu muchanan awor ta mas visual y e parti di lesamento ta keda na nan como biblioteca cu e tarea pa sigui stimula muchanan pa lesamento y combina esey cu partinan mas visual manera e bukinan cu nan ta presenta tur aña ta trece cune.

Pa e motibo ey cu e aña aki ta di dos biaha cu nan ta haci e festival virtual “nos ta haya hopi bunita e ilustracionnan cu ta wordo poni hunto cu storianan y hasta tambe tin algun cos cu a wordo haci cu por wak imagennan ta move, e ta trece algo nobo y innovativo pa e muchanan” di e manera aki por duna mas animo na e muchanan cu ademas di wak tambe nan tin cu lesa.

Door di pandemia biblioteca a cuminsa pensa pa e festival por sali via television y asina e muchanan por haya chens di wak e despues di scol y nan mayornan tambe pa asina por participa den tempo real.