(interestingengineering.com) – Compania basa na Luxembourg, Maana electric, tin meta pa manda cahanan chikito manera container, cu ta capaz di construi panelnan solar usando solamente electricidad y santo, na desiertonan na Tera pa asina yuda combati cambio climatico.

Si esey bay bon segun planea, e compania tin speransa di crusa e frontera final door di manda nan caha na Luna, Mars y mas leu pa asina yuda colonianan espacial futuro cu nan rekisitonan pa energia, segun un reporte di Inverse ta splica.

E proceso di e producto di e compania, Terrabox, ta parce demasiado simpel pa ta berdad. Manera Maana Electric ta splica riba su website, e Terrabox ta ‘un fabrica completamente automatisa, capaz di produci panelnan solar usando solamente santo y electricidad como input’.

E mini-fabricanan ta fit dentro di containernan di transporte, loke ta nifica cu por hiba nan na desiertonan, unda por produci panel solar cu ta necesario pa cosecha energia solar limpi. Apart di yuda combati cambio climatico, e producto potencialmente revolucionario tambe por yuda reduci e dependencia riba operadornan di energia renobabel na China, unda ta fabrica mayoria di e panelnan solar photovoltaico na mundo.

Converti Luna den fuente di electricidad pa biahe espacial

Maana Electric ta bisa cu ta bay test su tecnologia aki na Tera na aña 2022, mientras tambe ta desaroyando un version pa Luna di su Terrabox, cu ta diseña pa converti regolith Lunar den silicon di puresa halto. Esaki, den teoria, lo mester permitie produci un megawatt di panelnan solar anualmente. E proceso pa construi panel solar tambe ta libera oxigeno como subproducto, cual por ser utilisa pa futuro astronautanan pa crea ambientenan unda por hala rosea den espacio.

E Terrabox espacial di Maana Electric ta siendo diseña pa ta mas liviano pa asina por transport’e mas facilmente fuera di e planeta. CEO di e compania, Joost van Oorschot a bisa Inverse cu e Terrabox traha pa Tera y esun pa espacio ta comparti aproximadamente 60 porciento di e mesun tecnologia.

Cu e misionnan di NASA, Artemis y Lunar Gateway programa pa establece presencia humano riba Luna for di 2024, tecnologia di Maana Electric por yuda establece un presencia humano riba nos bisiña celestial di mas cercano.

Segun compania solar Aleman, Desertec, cubriendo apenas un parti chikito di desierto Sahara cu panel solar por duna suficiente energia pa henter e planeta – pues imagina kico por logra cu granjanan solar grandi riba Luna. Si e plannan di NASA y companianan manera Maana Electric ta exitoso, un Luna abundante den energia den futuro por actua como ‘springboard’ pa humanidad cu realmente por yama su mes un civilisacion espacial.