Dialuna 2 di augustus, Stichting Protestants Christelijk Onderwijs Aruba (SPCOA) tabata den reunion cu formador di gobierno y a trece dilanti e puntonan di mas importancia pa e stichting pa locual ta e sector educativo. Sr. Randall Croes, presidente di SPCOA, den un entrevista cu Bon Dia Aruba a duna un splicacion di con e reunion a bay.

Sr. Croes a splica cu un di e puntonan di mayor importancia pa SPCOA ta e proyecto di Havo cu ya ta den ehecucion desde aña pasa ora a cuminsa e aña escolar 2020-2021 usando e edificio di Mavo di e stichting. “Esaki a bay bon, pero ya a mustra di biaha cu nos falta espacio”, Sr. Croes a bisa. “Nos a pidi den añanan anterior caba presupuesto pa nos haya fondonan pa construi un edificio permanente pa nos por tin un Havo den nos structura di scol protestant.”

Durante e reunion SPCOA a presenta aprobacionnan cu tin caba di financiamento y e proyecto ta cla pa bay aanbesteding, mapa ta traha, presupuesto ta traha y di aña 2020 ya placa ta poni un banda pa e prome fase di e proyecto. Sr. Croes ta splica cu SPCOA tin premira cu pa zomer di otro aña, cuminsando aña escolar 2022-2023 e proyecto, cu tin un presupuesto di alrededor di 2 miyon florin, lo ta completamente cla y cu nan por tuma e edificio nobo.

SPCOA tin como meta cu e proyecto Havo aki pa duna e alumnonan un continuidad y organisacion den scol y sobretodo den idioma, cual ta un punto hopi importante cu Sr. Croes ta splica. “Nos ta kere cu e ta bon pa e muchanan pa den nan propio organisacion di nan scol, di loke nan ta custuma cune, e maestronan, e directornan, e filosofia di idioma pa nan por continua te ora nan caba nan scol sin tin mester di cambia di un scol bay pa otro, primario pa secundario, anto di secundario pa bay un Havo cu full un otro ambiente y lotro localidad”, Sr. Croes ta splica.

“E idioma Hulandes estrictamente como instructie taal, esey nos ta keda mantene. Otro scolnan cu ta aplica e idioma Papiamento durante splicacion den klas, nos no ta asina, nos ta bay mantene mesun norma cu ta bay cuminsa desde kleuter, bay na basisischool, scol secundario Mavo y te Havo nos ta mantene estrictamente idioma Hulandes so. E ta nos tradicion desde casi 120 aña, e aña aki nos ta cumpli 120 aña di educacion protestant na Aruba”, el a agrega.

E meta di SPCOA ta atencion pa e alumno individual Sr. Croes ta bisa, “We care, nos ta worry pa e mucha y nos ta sostene nan, pesey nos nivel di graduacion, di graduadonan, ta halto paso e atencion di scol chikito ta hopi directo, dus nos sa cua mucha ta sinta den klas semper y nos ta purba di mantene un contacto cu e mayornan pa nan sa, pa nos tur tres sa, mayor, alumno y scol ta na bon altura di desarrollo di cada mucha”.

“E scol Havo aki no ta solamente pa nos como protestant, mayoria ta studiantenan di otro religionnan, custumbernan y nos cu brasa habri ta duna e servicio na nan tambe. Dus nos ta un alternativa educativo di idioma Hulandes cu control cerca di cada un di e alumnonan. Nos kier sigui nan y nos meta ta pa nan gradua, dus nos ta haci nos best pa vangnan op ora cu nan mester di nos ayudo, paso nos meta ta pa e muchanan gradua y prepara pa bay studia den exterior of pa sigui studia akinan na Aruba. Esey ta nos prioridad, pa nos alumnonan sinti nos sosten y nos cariño cu nos ta duna nan. E otro ta e parti moral, civico, pa nos duna e muchanan un educacion cu tin un base di etica cu ta fit den nos structura, principalmente cristian pa nan bira bon alumno, bon studiante, bon trahado, bon lider mañan.”, el a agrega.

E segundo punto importante cu SPCOA a trece dilanti durante reunion cu formado ta inversion den e scolnan na San Nicolas. Sr. Croes ta splica cu; “Scolnan na San Nicolas cu falta di haya inversion pasobra mas cu 20 miyon a wordo inverti den diferente edificionan di scol den e ultimo 10 aña y nos ta kere cu ya, despues di hopi hopi decada, desde añana 60 ningun edificio nobo a wordo traha pa SPCOA y esaki ta un edificio chikito di 10 klas so”.

Durante e reunion SPCOA a pone e formado di gobierno na altura di detayenan cu formado no tabata sa y nan a entrega un rapport cu tur e deseonan di e fundacion pa locatie tambe caminda tin e nececidadnan di cada scol y kico ta e nececidadnan di e fundacion mes.

“Ta bon pa formado tabata sa kico ta e situacion di e scol y kico ta nos prioridad nan y haye preto riba blanco pa asina nan invetarisa e nececidadnan di henter e sector educativo di tur nos colega fundacionan, di otro religionan y otro departamentonan, scol publico, SKOA, SMOA of SVOA. Dus e ora nan tin un bon picture di kico nos tur mester”, Sr. Croes a bisa.

Sr. Croes ta bisa tambe cu un parti hopi importante pa por bay dilanti den e nivel educativo ta cu mester adapta na mas poblacion. “Corda bon nos tin casi 10 ana sin expancion grandi di klasnan di Havo, dus poblacion a crece y si nos kier pa e nivel educativo, di primario, duna mas alumnonan pa EPI, Havo y Universidad, nos mester tin e cantidad di klasnan di Havo pa aumenta, absorb e trabou cu mester haci den e sector nivel scol primario pa asina nos tin mas Havo leerling”.

“E ora nos lo absorbe e parti di e crecimento ey, y otro scolnan tambe mesun cos, bo mester tin caminda pa hinka e muchanan si nan ta Havo candidaat, si nos ta laga e mesun cantidad di klas e ora menos mucha ta bin na aanmerking apesar cu nan tin e capacidad pa Havo. Dus ta bon pa e espacio ey tey garantisa”, el a agrega.