Segun resumen diario di casonan di Covid-19 na Aruba di Departamento di Salubridad Publico DVG, ayera a registra 35 caso nobo di e malesa causa pa e virus SARS-CoV-2, y cu esaki a cantidad di caso activo a keda na 479.
Di e 35 caso nobo di Covid-19 cu a keda registra ayera, DVG a informa cu 8 ta turista mientras cu 27 ta residente di Aruba. E cifranan aki ta representa un tasa di positividad (‘Positivity rate’) bao di nos residentenan di 25%. E cantidad di fayecidonan relaciona cu COVID-19 ta 110.
DVG ademas a destaca den su resumen: “Datonan ta indica un aumento continuo di casonan nobo cu un averahe semanal di 54 caso pa dia, y un averahe di tasa di positividad semanal di 25% pa dia.” Autoridadnan di salud mundial ta recomenda pa tur persona sigui tene nan mes na protocolnan di salud, incluyendo tene distancia di 1.5m for di otro, laba man y usa hand sanitizer, y bisti tapaboca. Ta recorda tur persona cu maske cu ta completamente vacuna, ainda por transmiti e virus como tambe desaroya e malesa di Covid-19, pues ta importante pa cumpli cu e protocol di salud a pesar di ta vacuna.
Mientras tanto, den Hospital Dr. Horacio Oduber tin dies persona interna actualmente. Di e personanan aki, tres ta den Unidad di Cuido Intensivo ICU – dos como caso activo y uno como caso inactivo. Ademas riba piso general tin siete persona interna, di cual seis ta caso activo y uno ta inactivo.
DVG ta recorda tur ciudadano riba e procedura facil y accesibel pa haci test di SARS-CoV-2. “Cu e meta di por sigui test mas persona cu sintoma di Covid-19 cu ta posibel y yuda stop di plama e virus, a introduci un otro metodo pa comunidad por aplica pa un test, unicamente den caso cu tin sintoma”, e departamento di salud a indica.
Es cu tin sintoma di COVID y tin un AZV por subi e siguiente link of scan e QR code cu su celular: https://forms.office.com/r/tVgqB2atG1
