Señor Clifford Rosa, presidente di Stichting Rancho, ta splica den un entrevista cu proyecto- y actividadnan pa celebracion di 200 aña di Oranjestad a ranca sali caba cu e prome exhibicion den Centro di Actividad Rancho.

“Nos a cuminsa caba, esaki ta un di e actividadnan y tambe na e localidad nobo”, Sr. Rosa ta bisa. “E ta un inicio di mas exhibicion cu lo bay bin den futuro. Eigenlijk e ta un inicio pa mustra con arte ta yuda tambe den e transformacion y e mehoracion di cualkier ser humano, y ya vooral pa nos tambe, den e proyectonan aki cu nos ta purba di conserva of trahando pa conserva e historia y cultura di e bario di rancho”.

E punto di enfoke aworaki ta e celebracion di 200 aña di Oranjestad, y e exhibicion ‘Mi no tin Palabra’, tabata e prome di mas proyecto di arte y exhibicion cu Stichting Rancho lo trece pa dilanti.

“Mirando cu nos ta haci otro proyectonan, eigenlijk arte y exhibicion ta algo cu ta parti di nos metanan y esaki ta un muestra, dus esun aki cu a habri ‘Mi No Tin Palabra’, mi a pone den un serie aworaki di diferente diahuebs unda cu lo tin diferente charlanan y tayernan, na modo di bisa, cu ta cuminsa dia 5 aworaki, dus diahuebs awo”, Sr. Rosa a bisa.

“Asina ey lo tin mas diahuebs cu temanan tambe cu ta importante actualmente pa nos yega na diferente entendimento tambe di con pa atende of kico nos tin cu haci como comunidad. Tur cos cu nos ta haci ta pa e comunidad, pa yuda nos comunidad con pa compronde materianan cu tin di haber cu por ehempel violencia domestico of abuso di mucha manera cu ta bay tin e siman aki”, el a splica.

Sr. Rosa ta conta cu e proyectonan aki tin como meta pa informa y educa e pueblo di Aruba ariba e celebracion importante y historico aki. “Hopi hende no tabatin e comprendemento cu Oranjestad lo tin 200 aña. Por ehempel siman pasa nos a celebra e bicentenario di Peru aki na Aruba, anto niun hende no sa si mi bisa bicentenario di Oranjestad, kico e kiermen, papia cu cualkier hende puntra nan cuanto aña Oranjestad tin of ta bay celebra, bicentenario, kiermen eigenlijk nos no kico e fiesta ey kiermen pa nos”.

“Nos tur tin cu yuda, ban educa nos comunidad pa compronde cu nos tambe tin algo historico pasando, anto aworaki sigur lo mester ta Oranjestad. Dus e ora p’esey nos kier motiva tur hende pa cuminsa pensa. Na 2019 nos a bin ripara cu niun hende sa cu Oranjestad tin 195 aña, pa nos na e momento ey, dus p’esey nos a bisa cu ta incomprendibel cu tur hende ta yuda drecha Oranjestad pero niun hende no sa cuanto aña Oranjestad tin”, Sr, Rosa a agrega.

E proyecto di celebracion di bicentenario di Oranjestad ta uno grandi cu Sr. Rosa ta splica ta rekeri cooperacion di hopi hende, boluntario y otro instancianan cu ta traha pa haci esaki posibel.

“Nos pidiendo cooperacion di hendenan cu tin informacion pa alabes comparti informacion pasobra tin hopi investigacion pa haci, hende pa siña, muchanan pa educa. Nos tin Archivo Nacional ta trahando, Biblioteca Nacional ta trahando, dus eigenlijk e ta un partnership, e ta un cos di colaboracion, ban colabora cu otro ban traha hunto pasobra e cos aki ta di nos tur”, el a bisa,

“Desde ayera nos ta pidi donacion pa nos por sigui haci nos trabao pasobra sin fondo nos no tin eigenlijk nada p’esey nos ta pidi donacion y contribucion di hendenan, nos mester di boluntario, nos mester di hendenan profesional cu kier yuda crea un desaroyo publico tambe pa cu e area, y pa conserva e desaroyo economico y mehora esaki tambe”, el a agrega.