15 minuut di ventilacion conseha pa Rutte no tabata suficiente, segun expertonan

(NLTimes) – E conseho cu prome minister Hulandes, Mark Rutte a duna durante conferencia di prensa na mita di juli, pa refresca e aire na cas pa 15 minuut tur dia no tabata suficiente, segun profesornan di universidad a bisa Trouw.

Nan a bisa cu nan kier pa un team di experto reevalua e conseho.

A agrega ventilacion adecua na e lista di medidanan basico contra coronavirus na mita di juli ultimo, cual ya tabata inclui laba man, tene distancia social y haci test na momento di mustra sintoma, pero esey no ta suficiente segun e expertonan a declara.

Philomena Bluyssen di Universidad di Tecnologia Delft (TU Delft) a bisa cu e ventilacion di 15 minuut ta ‘un joke’. “Ventila e camber pa 15 minuut no ta suficiente. Imagina bo cu un persona ta huma varios sigaria paden, e huma no ta desaparece den 15 minuut.”

Bluyssen a propone instala un ‘task force ventilacion’. E team di experto aki lo por conseha gobierno hunto cu Outbreak Management Team, riba ki medida mester tuma contra coronavirus paden. Un task force asina ya ta existi na Belgica. Bluyssen tabata curioso riba ki informacion Rutte a basa su conseho. “Mi no por hay’e den ningun literatura.”

Habri bentana pa 15 minuut tur ora lo ta miho, Bert Blocken di Universidad di Tecnologia Eindhoven a bisa.

Siman pasa, gobierno a ricibi critica pa considerablemente reduci rekisitonan di ventilacion den sector hospitalidad. Na luga di refresca aire cada dies minuut, establecimentonan di catering mester a haci esaki apenas un bes pa ora. Insuficiente pa preveni transmision di malesa, segun expertonan. “Si bo tin un sistema di ventilacion mecanico, tene esaki cendi”, Bluyssen a conseha. “Solamente cende airco ora tin cliente, pasobra airco ta fria y reusa aire cu ya ta den e camber.”

Asina mes e expertonan tabata contento cu a agrega ventilacion na e medidanan basico contra coronavirus. “Ta importante cu e Gabinete ta conscientisa riba ventilacion door di inclui esaki den e medidanan basico. Te awo a dun’e mucho tiki atencion”, virologo Louis Kroes a bisa.

Un vocero di ministerio di Salud a bisa cu e conseho tabata ‘un decision practico basa riba guia di RIVM’. E ministerio a bisa cu mester haci mas investigacion pa determina con hopi ventilacion ta necesario pa preveni transmision di coronavirus. “Pues ta importante pa cumpli cu e conseho general”, e vocero a bisa.