(AP) — Un ciudad chikito den costa Caribense di Colombia ta druk yen di migrante for di Haiti, Africa y Cuba, haciendo loke nan ta spera ta bay ta un biahe den direccion di Merca.
Oficialnan local ta calcula cu mas di dies mil migrante a yega recientemente na Necocli, un ciudad di alrededor di 20mil persona miho conoci pa su beachnan, pal’i coco y volcannan di lodo. El a converti den un ‘bottleneck’ riba e ruta di migrante global cu ta pasa door di Sur- y Centro America, y djey na Mexico y frontera sur di Merca.
Residentenan di Necocli a bisa cu nan nunca a yega di mira asina hopi migrante, y autoridadnan di e ciudad a declara un ‘calamidad publico’ pa motibo di escasez di awa causa pa e demanda adicional di e migrantenan. Ombudsman Colombiano, Carlos Camargo riba diahuebs a bishita e wafnan di e ciudad unda botonan ta sali, pa verifica e situacion humanitario di e miles di migrante. “Mi ta haci un yamado pa mi contrapartenan den otro ciudadnan ehecuta accionnan conhunto pa confronta e problema aki”, el a bisa AP.
Pa hopi migrante, e biahe ta pasa for di frontera Ecuatoriano door di Colombia na Necocli, unda ferrynan ta transporta hende door di Golfo di Uraba na e pueblo ainda mas chikito di Capurgana – y for di eynan den un teritorio peligroso y sin caminda di Panama, conoci como e Darien Gap.
Pero e ferrynan por transporta apenas alrededor di 750 persona pa dia – mita di e 1,500 pa dia cu a yega recientemente. E ferrynan tambe ta shut down tin biaha den weekend, of pa motibo di mal clima. Pues e migrantenan ta warda, algun di nan ta huur camber den acomodacionnan barata pa turista, otronan drumiendo riba beach. Ora solo sali nan ta para den rij – tin biaha cu mucha den brasa – cu speransa pa cumpra e ticket di ferry pa $50.
Agencia gubernamental Defensa di Pueblo a bisa cu al menos 33mil migrante te awo e aña aki a pasa drenta Panama, mayoria di nan originario di Haiti, Cuba, Senegal y Ghana. Otronan for di Somalia, Guinea, Congo y Burkina Faso a pasa tambe. Esey ta un recuperacion enorme compara cu aña pasa, tempo cu restriccionnan di pandemia a reduci mobilidad pa tanto migrante como local.
E paso ta peligroso y autoridadnan Colombiano a identifica rednan di traficacion humano operando den e region. Migrantenan ta wordo yuda como tambe converti den victima mientras ta pasa door di Darien dentro di America Central y despues Mexico. Hopi biaha ta reporta violacion y robo.
Mientras hopi a drenta Colombia ilegalmente, oficialnan a haci tiki esfuerso pa deporta nan. Oficialnan di inmigracion a bisa cu lo ta demasiado caro pa deporta asina hopi hende.
