Pa SKOA awor paga trahadonan di limpiesa salario digno lo mester aumenta schoolgeld

SKOA tabata depende di pago pa medio di Direccion di Enseñansa pa paga su trahadonan di limpiesa e mesun salario cu trahadonan di limpiesa den otro organisacionnan escolar tabata ricibi. E diferencia ta cu e otro directivanan di scol tabata paga parti di e salario di nan trahadonan pa medio di e suma cu mayornan ta paga, esta e schoolgeld cu ta mas halto cu locual SKOA ta cobra.

Esaki a bira cla despues cu Director di SKOA Sra. Anuesca Baly a reuni cu Formado y miembronan di Raiz riba diferente punto. SKOA ta e Directiva di Scol mas grandi di Aruba, cu 46 scol en total.

Sra. Baly a bisa cu e tabata contento con e reunion cu Formado a bay, unda a haya oportunidad pa presenta puntonan di preocupacion riba e tema di enseñansa en general na e organisacion, pero e tema di e trahadonan di limpiesa y scolnan cu mester di renobacion, proceso di digitalisacion y inversion tambe a bin na discusion.

Tambe a papia riba e posibilidad pa hisa schoolgeld. Na e momentonan aki SKOA ta cobra 325 florin pa scol basico y 400 pa scol secundario (MAVO). Segun Baly, SKOA ta keda e organisacion escolar mas barata na Aruba. “Ultimo biaha cu SKOA a aumenta schoolgeld tabata na 2015.”

Trahadonan di limpiesa

Director di SKOA a splica cu e tema di trahadonan di limpiesa ta keda crucial. Tin un proposicion riba mesa hunto cu Mediado di Gobierno Anselmo Pontilius y SEPPA, cu awor ta pasando evaluacion huridico. “Nos a cuminza combersa cu e grupo pa pone nan na altura y analisa e situacion y mira unda pa bay. E situacion pa nos ta alarmante. Nos ta den e situacion aki desde Januari 2020.” E disputa ta cu prome cu e Decreto Ministerial firma pa ex Minister di Enseñansa Michelle Hooyboer na 2015, SKOA tabata ricibi subsidio pa paga e trahadonan pero cu e suma tabata cubri un salario di 600 florin pa luna.

Locual e decreto ministerial a haci ta pa percura cu e salarionan di e trahadonan di limpiesa haya e diferencia cu nan coleganan den otro organisacion escolar, manera DPS y SPCOA tabata gana. E pago tabata sali di Direccion di Enseñansa. Pero, segun Minister di Enseñansa Demisionario Rudy Lampe, el a haya notificacion di Direccion di Finanzas cu e pagonan aki ta ilegal y cu si e Minister no drecha e situacion aki, e lo mester asumi responsabilidad pa fondonan cu ta sali di forma inapropia. Pa tal motibo a para e pagonan, cu a genera tur e protestanan y casonan den Corte cu a duna e Minister razon. Consecuentemente, a bin un debe di 12 miyon cu segun Lampe, SKOA lo mester paga bek na Gobierno.

Pago igual pa tur trahado di limpiesa na tur scol

Pero Director di SKOA ta bisa cu e organisacion no tin e fondonan pa paga e 12 miyon aki, pasobra no ta SKOA a ricibi e placa sino cu el a bay directamente pa e trahadonan di limpiesa. Pero Anuesca Baly ta puntra si ta considera si e trahado di limpiesa di SKOA tin e mesun derecho cu nan colega den otro organisacion escolar. “Locual e trahado di limpiesa na scolnan publico ta gana ta un poco mas cu sueldo minimo. Si mester aplica e subsidio di explotacion pa limpiesa di scolnan di SKOA, e ta nifica cu hasta pa un scol chikito di como 200 mucha, un solo trahado lo mester haci seis klas, 12 baño, gymzaal, dos oficina, mas baño di docentenan limpi pa 400 florin.”

Segun Director di SKOA, e trahado lo no por haci e trabao aki den ocho ora pasobra e pago no ta suficiente, y consecuentemente SKOA lo no por garantisa limpiesa. Pa scolnan mas grandi, e subsidio ta yega na unicamente 600 florin pa trahado. “Nos lo no haya hende pa haci e trabao pa e suma aki,” Baly a bisa, agregando cu 600 florin pa luna no ta digno. “E ora ta keda cu scol sushi.”

E Director di SKOA a splica cu ta p’esey a bin e discusion na 2015, pa e subsidio aumenta. SKOA no ta un compania cu ta genera placa. E placa di scol ta pa mantencion chikito, entrenamento di docentenan, paga hende cu mester pero no ta haya subsidio di Gobierno y airco cu coriente. “SI kier pa SKOA mes carga e gasto anto mester hisa schoolgeld,” Baly a splica.

Decreto Ministerial di 2015

Dr. Rudy Lampe a bisa siman pasa cu e mensahe cu el a ricibi di Direccion di Finanzas tabata cla. Sea ta stop e pago adicional pa trahadonan di limpiesa, banda di e subsidio regular, of e ta personalmente responsabel. Director di SKOA a bisa cu e no a tende Minister declara esaki, pero no por bisa ken por a haci fout na 2015 pa a paga e trahadonan di limpiesa directamente. “Mester bin mehoracion si. Pasobra awor kier cobra SKOA e 12 miyon florin cu a paga. Pero no ta SKOA a keda cu e placa. El a bay na e trahadonan cu a eherce nan trabao.” Director di SKOA Anuesca Baly a bisa cu a duna Formado Evelyn Wever Croes tur documento necesario a por yega na un solucion mas lihe posibel, particularmente pa kita e incertidumbre cerca e trahadonan.