Durante un conferencia di prensa diahuebs mainta, vocero di AZV, señora Solange Tchong hunto cu Dr. Joost Samuels, Chief Medical Officer, a duna informacion importante tocante algun dokter di cas cu no lo bay traha mas cu AZV, y alabes a contesta algun pregunta ariba e situacion financiero di AZV actualmente.

Dentro di poco dokternan di cas Dr. Pieterse-Clements, Marjorie, Dr. Pieterse, Huub y Dr. Orlay Gonzalez Diaz lo stop di traha cu AZV. Den bista di esaki AZV ta percura pa un traspaso automatico di e pashentnan di e dokternan aki pa asina percura cu nan lo keda ricibi e cuido medico cu nan mester. Adelante informacion pa pashentnan di e dokternan aki.

Den e siguiente dos luna tur e pashentnan di Dr. Pieterse-Clements, Marjorie lo bay ricibi servicio medico via e oficina di dokter di cas Aury Wever situa na Caya Ernesto Petronia 74 caminda e Dr. Pieterse-Clements lo tin su propio oficina. Pa mas informacion por yama na 585-7521 of number di emergencia 562-8186.

Pashentnan di Dr. Pieterse, Huub lo ricibi servicio medico via e oficina di dokter di cas Priscella Tjon-Kong-Sang na Katoenstraat 11. Durante e prome siman di augustus Dr. Tjon-Kong-Sang y Dr. Britt-Croes lo brinda e servicio na e pashentnan di Dr. Pieterse, Huub. Dia 9 di augustus un dokter nobo lo yega for di Hulanda pa atende e pashentnan na e mesun localidad. Pa mas informacion por yama 566-0266 of number di emergencia 566-0260.

E pashentnan di dokter di cas, Dr. Orlay Gonzalez Diaz, lo wordo traspasa automaticamente pa dokter di cas Dr. Dennis Rasmijn ken lo sigui brinda servicio medico na tur pashent na e mesun localidad situa na Bubali 72 F.

Sra. Tchong a expresa palabranan di gratitud pa e dokternan di cas saliente y a yama bon bini na e dokternan nobo. “Como AZV awe mainta nos kier gradici e dokternan di cas saliente pa tur e añanan di servicio cu nan a yuda e aseguradonan di AZV y na mes momento nos ta yama bon bini na e dokternan di cas nobo cu ta bay start aworaki pa yuda nos aseguradonan”, el a bisa.

Sra. Tchong a splica: “Den e caso aki no tabatin ningun retiro, den e caso aki e dokternan mes riba propio iniciativa a manda avisa AZV cu nan ta desea pa stop di traha cu AZV, algun tabata bisa cu ta pa motibonan personal. E dokternan di cas cu nan mes a indica cu nan kier stop di traha cu AZV”.

E situacion financiero di AZV ta uno cu ta preocupa pueblo di Aruba hopi, specialmente aseguradonan di AZV, pa motibo di e exigencianan di Hulanda pa reduci gastonan den e area medico cu un suma significante. “Esaki ta ainda un punto cardinal pa AZV den e sentido cu ainda nos ta mara na e mesun instruccion, e 60 miyon florin ta un hecho cu kier esey”, Sra. Tchong a bisa.

“Pa e pregunta si nos ta logrando, esey nos tin cu bay wak pasobra pa 2020, si mi no ta ekiboca nos por yega casi un 35 miyon, plus minus no, e ta depende con a cera e aña. Pero si nos tin pa 2021 ainda e mesun exigencia, dus e no ta cu e exigencia a kita y AZV ta eigenlijk pendiente di algun factor. Un factor importante ta e formacion di gobierno, esaki mester keda finalisa prome. Y unabes cu esey finalisa e ora ey ainda bo tin e trayecto cu leynan den parlamento mester bay wordo adapta segun e decisionnan cu gobierno tuma”, el a splica.

AZV a introduci un “5-wave-model” caminda tin algun sugerencia di medidanan of instrumentonan y di otro banda comision nacional tambe a duna gobierno algun sugerencia, plannan caminda por wak unda por haci reforma. “Kico esey ta nifica, cu nos como AZV mes no tin un influencia directo ariba esey. E no ta un decision di nos pasobra AZV den 2020 caba a purba di duna sugerencia of adaptacionnan na unda cu nos si tabatin e autoridad pa haci cambio”, Sra. Tchong ta señala.

“Un ehempel, den 2020 nos a haci adaptacion den e parti di cuido medico den exterior, unda nos a introduci un aporte propio ariba e ticket di biahe di e acompañante. Unda nos a bisa cu eynan nos por a haci adaptacion pasobra cu nos mes tine den man como maneho. Pero tin cierto instrumento- of medidanan cu ta rekeri di un cambio den e ley mes directo pa bo por bay over na ehecuta esaki. Anto esey ta haci cu pa aworaki nos ta wardando pa formacion di gobierno keda cla. E ora e gobierno cu bay sinta lo tin cu bay tuma su decisionnan basa ariba e consehonan of documentonan cu e tin, anto e ora ey nos por bay wak con AZV ta bay ehecuta e decisionnan aki”, el a splica.

Sra. Tchong a contesta e pregunta cu den varios caso pashentnan no ta contento cu e servicio cu nan ta ricibi di nan dokter di cas y ta opta pa haci cambio di dokter, bisando: “Na prome luga mi mester bisa cu e ta un tiki sorprendente si, pasobra si ta asina, nan no ta yega nos oficina. Mi por confirma di 2001 pa aworaki, 20 aña di existencia di AZV, mi por confirma boso cu semper nos a mantene traspaso automatico. Sinembargo cu e oportunidad cu si un pashent no ta di acuerdo, e por pidi pa un cambio cu un otro dokter di cas”.

“E dos periodonan cu nos ta mantene ta e luna di maart y september standard pa cambio di dokter di cas, sinembargo nos tin tambe un procedura cu ora clientenan no ta di acuerdo of no ta bay mucho bon cu e servicio, cualquier motibo cu tin, e ora ey e por tuma contact cu nos, nos ta duna generalmente un aprobacion pa cambio di dokter di cas na momento cu e pashent mes a haya un dokter di cas nobo, dus cu el a busca un aprobacion y e tin sigur cu e dokter di cas di su interes a dun’e un okay cu nan tum’ele. E momento ey nos ta haci e cambio”, Sra. Tchong a agrega.

Sra. Tchong ta bisa cu AZV ta urgi e pashentnan tambe pa “toch duna di bo banda tambe, duna e dokternan di cas nobo aki un oportunidad. Pasobra di un banda AZV a haci e esfuerso pa boso por haya un dokter di cas nobo, es decir pa bo tin e trankilidad cu bo ta inscribi na un oficina unda e servicio ta sigui. Y na mesun momento tambe pa brinda dokternan di cas e oportunidad pa nan tambe por ser conoci cu bo, kiermen basa bo mes ariba experiencia propio”.

E relacion entre AZV y HAVA ta un relacion tenso for di un tempo caba, Dr. Joost Samuels splica un poco ariba e situacion actual entre e dos instancianan aki. “Nos ta papia cu HAVA, nos ta papia cu dokternan den bestuur di HAVA, naturalmente tin un tiki tension pero nos ta profesional y nos ta sigui papia ariba tur topico cu ta necesario”, Dr. Samuels a bisa. “Nos tur dos tin nos opinion, esey no a bin hunto completamente, pero manera mi a bisa caba nos ta papiando. Mi ta spera cu den e lunanan cu ta bin awo cu nos por haya un solucion”.