E reto mas grandi ta pa haya tereno pa mas molina di biento

Aruba lo mester bira neutral riba emision di gas fossiel pa 2030 y Utilities Aruba NV a presenta e plannan aki na Formado Evelyn Wever Croes hunto cu miembronan di Raiz. Ayera ing. Richard Eman a bishita formado den su calidad di Director di Utilities Aruba NV unda a tuma un tempo relativamente largo pa discuti e vision riba maneho di energia cu tin y kico e posibilidadnan ta.

Y e posibilidadnan ta grandi, Eman a bisa na final di e reunion. Pa e ultimo tres aña y mey a traha riba un vision di energia pa Aruba, cu ta inclui resolucionnan cu awor ta riba papel. A base di e resolucionnan aki a traha un plan di factibilidad pa yega na un operacion cu ta basa riba energia renobabel, ing. Eman a bisa na final di e reunion cu Formado. “Nos a pasa pa un proximo plan cu ta e ‘Decarbonization Pathway’ ( E ruta pa Decarbonisacion). Awor ta trahando riba ki sorto di configuracion mester tin pa yega cumpli cu meta di e Acuerdo di Paris, cu ta exigi pa yega na cero emision di carbon na 2050. Pero mi ta mira cu nos por yega na 2030 caba yega na un emision net cero. E ta posibel.”

Mester di tereno

Pero pa logra esaki, mester di tereno. Mester espacio pa pone mas turbina di biento cu ta ainda e produccion mas realistico pa aumenta e cantidad di energia genera pa fuente alternativo. Richard Eman, riba pregunta di Bon Dia Aruba a bisa cu ta studiando e posibilidad pa expande e parke di turbina di biento na Vader Piet, cu ta duna mas espacio pa instala mas turbina sin cu nan ta mucho cerca di cas. Pa loke ta panelnan solar, tin suficiente tereno, incluso espacio den e area di refineria, cu tin suficiente tereno.

Solarpark di WEB na Lago Heights ta operando. Pero e contribucion di seis megawatt di e parke aki ta apenas 1.5 porciento di e necesidad di energia pa Aruba. E parke ta mustra grandi. Pa energia renobabel na Aruba, biento y solo ta e fuentenan mas logico. Y e turbinanan di biento ta locual ta hopi mas eficiente. “Lo haci un combinacion di solo y biento. Pero e generacion di coriente for di panel solar ta menos compara cu turbina di biento.”

Pero ta pa motibo di e protestanan den pasado di habitantenan di Urirama y cercania, a dicidi pa wak con por expande e parke di molina di biento na Vader Piet. “No por pone algo pa stroba e comunidad. Nos plannan ta mas dirigi den e area di Vader Piet y Rincon, unda no tin cas den bisindario. Mester tene un distancia di 850 meter for di cualkier cas.”

Eman a admiti cu e reto ta grandi pa por haya suficiente tereno pa instala mas turbina di biento.

Inversion pa fuentenan alternativa

Utilities den su proyeccionnan a tene cuenta cu diferente proposicion pa yega na e fuentenan alternativo pa produci energia. Sea ta cumpra e ekiponan, of ta bay den e modelo ‘Build, Operate and Transfer, BOAT ( Traha, Opera y Traspasa). “Tin diferente opcion. Nos no ta asina leu. Te ora cu nos caba di determina cuanto molina por pone, si tin e tereno pa pone nan, e ora lo haci un destaho. Di e momento cu sa kico mester, e ora por cuminza papia di financiamento. Pero mirando e hecho cu a haya prestamo den forma solido (recientemente), mi ta sigur cu e cantidad di placa cu mester pa e proyecto di energia renobabel lo no ta bay ta un problema. Ademas, no ta cuestion cu ta bay traha e proyecto den un solo tiro.”

Reduccion gasto di coriente

Fuentenan di energia alternativo no solamente lo yuda reduci e emisionnan di gasnan peligroso pa clima, pero Richard Eman ta convenci cu nan lo yuda reduci e gasto di produccion di coriente cu ta nifica un prijs mas abou pa consumidor. “Nos lo por baha prijs di energia, prijs di coriente y awa lo por baha. Y nos a duna splicacion na Formado. Mi ta kere e entusiasmo tabata grandi.”

Bon Dia Aruba a puntra ing. Eman kico ta e diferencia entre e vision di Utilities pa Aruba ta depende di energia a base di fuentenan renobabel pa 2030 compara cu e plan di Gobierno Mike Eman I y II, cu a pone como meta e fecha di 2020. Richard Eman a bisa cu e plan di Utilities ta uno concreto basa riba resolucionnan fiho. E vision di 2020 mas bien tabata un ideal, segun e Director di Utilities NV.

Financiamento pa inversion den WEB

E referencia na financiamento cu Eman a haci a lanta pregunta kico a pasa cu a pone e financiamento di AIB Bank, hunto cu un consorcio di banconan un banda. E consorcio aki tabata financia proyectonan grandi pa WEB pa hopi tempo. E interes cu e banconan tabata cobra tabata alrededor di seis porciento, cu segun Richard Eman ta uno substancial.

Pa e motibo ey mes, Utilities Aruba a dicidi pa consolida e prestamonan di WEB, Elmar y Utilites pa asina tin un grupo mas grandi, y cu mas forsa pa negocia. A scoge pa un sistema unda banconan por a participa na e posibilidad di por brinda e financiamento cu tabata busca. A logra haya un prestamo di 700 miyon florin a base di e modelo consolida aki. Aunke cu segun e acuerdonan cera no ta permiti pa publica cuanto ta e interes cu awor ta paga, “en todo caso, mi ta garantisa cu e hopi mas miho cu locual nos a haya di AIB. Pues dado momento a pone AIB un banda. Berdad nan no a gusta. Directiva di WEB tambe tabata kier a keda cu AIB,” Richard Eman a comenta.