Diabierna pasa, banda di tratamento di presupuesto den parlamento, tabatin un caso den Corte, entabla pa e partido opositor social cristian. E caso aki tabata continuacion di e caso cu a tuma lugar dia 5 di juli ultimo, unda tres exponente di e partido cu ta alavez miembro di parlamento actual, elegi den e mesun eleccion cu nan ta cuestiona tanto, a pidi na promer instante un ‘ordemaatregel’ di huez pa para e eventual eliminacion di e votonan. Den e caso sumario e parti demandante a exigi un reconteo completo di voto, o si esey no por, un reconteo di e votonan cu a keda declara no valido. Segun ley electoral, mester percura pa elimina e documentonan unavez e proceso electoral ta conclui. Esaki ta conclui cu e aceptacion di e parlamento nobo den su composicion nobo manera a resulta di e eleccion supervisa pa Conseho Electoral.

Mester recorda cu huez den e peticion inicial di duna un ordemaatregel pa preveni e eliminacion fisico di e votonan, a nenga tal peticion y cu esey caminda tabata habri pa Conseho Electoral enberdad haci su trabao segun ley. E presidente nobo di Conseho Electoral a opta pa no haci esaki y mantene e documentonan warda te cu e caso cu a bay Corte diabierna pasa, keda conclui cu un sentencia. Esey por mir’e como un gesto di e presidente nobo, pero e no tabata obliga di actua di e manera ey. Pero, warda un rato no ta costa nada, y ademas esaki no ta implica cu e tres demandantenan ta bay haya razon den Corte. Esaki por a destila caba di e decision di huez den e peticion pa e ordemaatregel, tumando na cuenta cu e argumentacion di e huez tabata basa mayoritariamente riba e consideracion cu e ta sigui e argumentacion di e presidente (anterior) di Conseho Electoral cu e proceso debido di revisa e casonan unda tabatin keho, a tuma lugar caba riba e mesun dia di eleccion. Esey tin su motibo: asina e ley ta bisa. E promer momento cu e publico tin pa cuestiona un decision di e presidente di mesa di un urna ta durante e conteo di voto na e urna mes. E presidente ta obliga di mustra e biyete di voto na e publico si tin deseo pa mira esaki. Despues a tuma lugar, segun e presidente saliente, un revision di e casonan unda a bira conoci cu por tabatin problema. No a constata nada.

Mester tuma na cuenta tambe cu na cada urna tin persona di diferente orientacion politico presente, sea como miembro di e comision cu ta dirigi e proceso di conteo, sea como ‘checker’ pa nan partido, sea como publico en general. Henter e proceso aki, cu a cana bon na gran mayoria di e urnanan, unda e propio partido social-cristian tabatin su hendenan presente, no a duna como resultado cu tabatin motibo pa cuestiona e proceso. Sin embargo, a trata di fabrica un issue via e cantidad di voto declara invalido, cu tabata den 890, loke ta parce hopi, pero tempo cu na 2017 tabatin 751 voto no valido, y cu menos urna, e partido berde a sufri un perdida di mas di 10.000 voto, y nos no a tende ningun murmuracion.

Awor, ta dificil imagina cu un huez den e caso sumario ta bay desvia di e argumentonan duna caba den e anterior disposicion riba e peticion encuanto e ordemaatregel, y lo sentencia pa haci un reconteo completo, pasobra no tabatin ningun disonante na mayoria di e urnanan. Reconteo di e votonan no valido lo no resulta den e diferencia cu e partido social cristian ta busca, pasobra nan a pasa caba den e debido proceso durante e conteo dia 25 di juni mes. Henter e asunto aki no ta parce nada mas cu e actuacion di algun ‘sore losers’ cu no por acepta perdida di como 5.000 voto, y envez di bay analiza con nan a yega na e segundo derota mas grandi den ultimo decadanan, ta haci Corte perde tempo cu e tipo di caso aki. Pasobra un cos ta sigur: nan a acepta sin mas cu e proceso tabata asina bon cu di ningun manera nan ta cuestiona nan propio eleccion, y ningun di e votonan cu nan mes a ricibi. Ey si tur cos a cana ‘netjes’.

Te na e momento aki nos por ripara cu ainda e partido opositor aki tin un problema cu custumbra cu e papel di partido opositor. Durante e ultimo periodo di gobernacion no por bisa cu nan a hiba un papel estelar como oposicion y di e manera ey no solamente a decepciona nan propio base, sino pueblo en general pasobra e sistema democratico ta basa riba un oposicion fuerte cu ta cuestiona gobierno y su apoyo na e otro banda. Es mas, e otro parlamentarionan cu en principio ta sostene gobierno, tambe tin e obligacion pa cuestiona loke gobierno tin pensa di haci. No cu esey ta resulta semper, esey nos por mira na e salida di un parlamentario cu su so a detene e proyecto maligno di e incinerator. Unico problema ta cu ainda e asunto di dump ta sin solucion. En todo caso, lo ta bon pa e partido opositor haci su trabao, envez di ta e ‘sore loser’ cu ta busca hustificacion unda no tin.