Diabierna Gerencia di Elmar mester duna claridad na pago di ahuste di costo di bida, manera ta palabra den un protocol, sino trahadonan di ELMAR lo bolbe bay den accion. Diabierna siman pasa, trahadonan a entrega yabi, auto y badge y a nenga di keda pendiente pa cualkier eventualidad den fin siman como protesta, pasobra no a paga e indexering cu ta coresponde na nan.

Asina Presidente di Sindicato ALVAST, representando staff di Elmar a bisa Bon Dia Aruba.

Ta asina cu na 2019, ALVAST y Elmar a firma un protocol pa garantisa pago di indexering. Pa motibo di e pandemia, Gerencia di Elmar a pospone e pago na 2020, pero trahadonan a ricibi na indexering pa fin di aña.

Sinembargo, sin cu a avisa mes, a keda sin paga e indexering cu mester a drenta pa Juli 1. Y esaki tabata basa riba un decision di gerencia di Elmar sin cu a envolvi e sindicato, Maduro a conta. Consecuentemente a tuma accion Diabierna pasa y ayera a sali tres ora for di trabou pa expresa disgusto.

“E indexering no tin nada di haci cu e cortamento di 12.6 porciento cu a aplica riba tur salario, cu ta cinco porciento di cortamento di salario y tambe cortamento den e beneficionan,” Maduro a bisa. “Esaki ta un protocol totalmente separa cu gerencia y Utilities riba nan mes a dicidi pa pone un banda.”

Segun Maduro, tabata e Director nobo, Anthony Irausquin cu a tuma riba su mes pa no paga e indexering ya cu segun su splicacion ayera na e trahadonan, e ta den negociacion cu Utilities Aruba riba e retencion di 12. 6 porciento, pa mira si trahadonan por haya dianan di vakantie a cambio.

“Ma bis’e cu nos no ta interesa den e punto ey na e momentonan aki, pasobra ta for di Januari ta sinta na mesa pa busca un solucion. Te cu awor aki Utilities no a ‘come across’ cu nada. Nos tin diferente asunto pega cu Utilities, pero esey no tin nada di haber cu e pago di ahustacion di costo di bida.”

E director a bisa cu e no a bisa cu no por paga esaki, segun Maduro, pero cu awor no por cumpli cu e protocol, pasobra e kier yega na un solucion cu Utilities. “Ami a cord’e riba e protocol cu ta poni cu e mester paga e indexering pa Juli y ta mustra comosifuera cu e Director a tuma e decision riba su mes sin sikiera notifica sindicato cu no ta haya pago. Unda e comunicacion ta keda? P’esey e trahadonan a rabia, y diabierna atardi a entrega yabi, auto y badge como protesta.”

ALVAST no ta kere cu e negociacion riba proposicion di Gerencia di Elmar riba 12. 6 porciento di retencion mara na mas dia di vakantie ta permiti pa djis pone un protocol un banda. “E pago di ahuste di costo di bida no por ta mara na nada otro. Aña pasa, Ing. Koolman a bay de acuerdo pa paga e indexering, aunke laat. Pero e Director actual a tuma e decision riba su mes pa keda sin paga, sin envolvi e otro partido cu ta sindicato. Ta nos dos mester yega na acuerdo. No ta e Director su so por dicidi pa pospone e pago.”

Raymond Maduro a bisa cu e situacion na Elmar tabata malo, e lo por compronde e posponemento. “Pero e situacion na Elmar awor no ta malo.”

E pago di ahuste di costo di bida ta riba henter e salario di e trahadonan, aunke cu ta retene cinco porciento tur luna, y cu reduccion riba beneficionan, e ta acumula na 12.6 porciento pa aña. “Di Januari pa awor ta kitando cinco porciento, sin cu a envolvi sindicatonan. Te ainda ALVAST ta den deliberacion cu Utilities riba e punto aki, y a manda tres proposicion. Pero Utilities no a acepta ningun y e discusion ta awor si ta duna e 12.6 porciento, cu ta e retencion di cinco porciento di salario mas reduccion di beneficio, na forma di extra dia di vakantie. Nos mester bringa esey como trahado. Director di Elmar no ta esun pa negocia pa e trahado. Nos a manda tres proposicion y Elmar a dicidi pa bay cu un otro na Utilities. Pero esey no tin nada di haci cu e ahustacion di costo di bida,”el a ripiti.

Gerente di Elmar lo mester duna contesta Diabierna awor, pa 12’or di merdia. Si dicidi cu no ta paga, ALVAST lo tuma paso mas fuerte. “Gerencia lo ta responsabel si mester bay den accion atrobe,” Raymond Maduro a enfatisa. Mientrastanto, Irausquin a bay de acuerdo pa no castiga e trahadonan pa e tres oranan di protesta ayera, ya cu nan a tuma accion pa haya nan derecho. “Pero si diabierna no paga, nos ta afo atrobe.”

E suma pa cua ta papia awor ta 85 florin pa trahado.