(El País) Colombia tin un di dos proyecto di ley pa recauda mas impuesto. E biaha aki ta spera cu e proyecto aki si por bira ley. Negoshinan lo contribui 70% di e entrada, lo ataca evasion di impuesto y gobierno lo compromete su mes pa gasta menos. Si e propuesta pasa Congreso, lo cumpli cu e promesa di no afecta e clase mediano, cual un par di luna atras a causa indignacion cu a conduci na protestanan cu ta sigui te dia di awe.
E di cuater economia mas grandi di Latino America ta bin yena cu debe e ultimo añanan, cual ta crea un peso riba finanzas publico. April ultimo presidente Iván Duque a purba pasa un reforma fiscal ambicioso cu lo a haci di tur programa di asistencia un ayudo basico universal, pero cual alabes a hisa e base di contribuyente. Asina tirando un peso di impuesto repentino riba gruponan cu tin tiki ingreso.
Den reaccion riba e protestanan, José Manuel Restrepo, minister di comercio, a cuminsa traha riba un propuesta nobo pa reforma fiscal, cual a wordo manda diamars ultimo na Congreso. E biaha aki gobierno ta propone pa baha cierto beneficionan cu contribuyente grandi ta disfruta, manera negoshinan, y pa revisa e pago di impuesto den ultimo 5 aña. Gobierno kier recauda 1% di e Producto Bruto Nacional, cual ta yega na 15.2 biyon di pesos (3900 miyon di dollar).
Benito Berber, economista hefe pa Latino America di e banco di inversion Natixis a bisa cu ‘e ta un reforma menor y no tan ambicioso, pues ta probable cu e lo bay wordo aproba’. Na mes momento Berber ta nota cu ta importante pa subraya cu gobierno ta limitando su hablidad pa endeuda su mes den termino largo y medio.
