Mas o menos ministro…O mas o menos colaborador…?

Awor cu ta acercando e momento cu lo bira conoci na ki acuerdo e dos partidonan den e coalicion nobo a yega, y ken lo bira ministro, tambe a cuminza e discusion kico ta e cantidad di ministro aceptable, deseable o factible. Hopi hende ta mustra riba e situacion financiero dificil den cual e pais ta y cu no ta permiti ningun tipo di wega politico cu ta bay costa mas placa. Pasobra a final de cuentas, ta nos ta paga tur esey. Di e manera aki a surgi un debate fuerte si ta 7, 8 o 9 ministro mester tin.

Mira di un aspecto puramente tecnico, nos ta pensa cu 7 ministro ta mas cu suficiente. Es mas, cu menos cu esey tambe por, ta depende di e calidad di e mandatarionan como manager. Nos Constitucion en todo caso lo no duna problema si mester bay na menos cu 7, pasobra solamente ta menciona un maximo di nuebe ministro. Si acaso lo desea mas di nuebe, anto si lo mester cambia Constitucion. Nos ta supone cu ningun hende kier bay eynan. Pero bolbiendo na e tema di menos di siete, mas importante cu e cantidad di ministro, ta e manera con e ministerionan ta organiza. Loke na e momento aki ta duna e discusion tocante e cantidad di ministro cierto relevancia, ta e hecho cu opta pa un ministerio mas ta implica opta pa un grupo di hende extra cu ta haya trabao directamente na despacho di e ministro. Y no solamente esey, pero e tin consecuencia tambe pa e personal di e departamentonan cu ta cay bao di un ministro. Regularmente ta sucede ainda cu amigo y famia no ta haya trabao na e despacho di e mandatario so, sino cu ta usa e oportunidad tambe pa staciona elementonan di nepotismo den e aparato publico.

Na e momento aki nos tin e situacion cu e ministronan tin un acuerdo cu nan no ta surpasa e cantidad di 25 colaborador na nan despacho. Esaki ta hopi menos cu e gobierno anterior tabata emplea, unda e ministro presidente so caba tabatin mas di 140, pero esey no significa cu esaki, e 25 persona, mester keda e norma pa semper. Ta bon posible pa traha cu menos hende y den pasado ministronan di e tempo ey a demostra esaki tambe. E forma pa haci esaki ta pa limita e cantidad di asesor, y un staff administrativo minimo, no mas cu cinco hende en total. Di unda e resto di experticio mester bin? Di e departamentonan. Nos mester pone un fin na e financiamento di dos equipo di experticio, e top di e departamentonan y e ‘team’ di e ministronan. Y mester tuma na cuenta cu na e momento aki dificilmente por califica e gran mayoria di e personanan na e respectivo despachonan como asesor, nan ta mas tanto staff di definicion desconoci, cu dificilmente por hustifica nan presencia como indispensable. Ademas, esaki no ta e hendenan cu e salarionan mas modera, pa bisa esaki na un manera elegante. Hopi di nan ta ‘underqualified’ y ‘overpaid’ y ta bira tempo pa haci opruiming den e despachonan, dunando bon ehemplo unda e proximo gobierno ta desea di bay, si nan ta di acuerdo cu den e añanan cu ta bin, sea ta haci mas cu mes hopi placa, o ta haci mes hopi cu menos.

Pero banda di e ‘streamlining’ di e ministerionan, ta keda algun asunto pa regla mihor encuanto e composicion di cierto ministerionan. Tin di nan ta bon regla, por ehemplo e ministerio di Desaroyo Teritorial, Infrastructura y Medio Ambiente ta mustra elemento di cierto logica cu nan ta hunto. Pero di otro banda nos ta haya cu nos economia pa su maneho no ta den un man: tin un ministro di turismo so, y e resto di economia supuestamente ta cay bao di ‘asunto economico’ cu den ultimo añanan ta ser duna na otro mandatario. Lo no ta hopi mas sensato pa duna un ministro ambos cartera, envez di e combinacion actual cu Salubridad Publico, cu lo ta mihor den man di un otro ministro cu tin esaki como cartera principal? Y ya cu nos ta reglando cos den e esfera aki, lo ta bon pa considera di saca e permisonan di restaurant y bar, y di acomodacion turistico for di e actual ministerionan, y pone esakinan den man di e ministro di asunto economico, pa loke ta e permiso pa opera. Esey no ta kita nada di e derecho y obligacion pa Salubridad Publico y otro autoridadnan controla tur establecimento, y si ta necesario laga cera nan (temporalmente), pero asina por percura pa nos keda libra di e procesonan interminable pa yega na permiso pa opera pa e sectornan aki. Loke nos a tende recientemente ta e grato noticia cu ‘red tape a disparce’ pero esey ta conta solamente pa e permiso di establecimento bao di Vestigingsverordening. E caminda di cruz pa restaurant, bar, hotel y otro acomodacion bao di e Vergunningsverordening, cu den cierto caso por dura varios aña, no a kita. E unico ‘red carpet’ cu nos a mira te awor ta na establecimentonan unda e doño mes a scoge pa e color ey, pero di banda di gobierno, nada. Ta importante pa den e tempo nos dilanti duna atencion na e problemanan aki.