Economia ta mehorando, bao di influencia di un turismo cu ta mustra avance fuerte. Esaki tambe yabata base di e anuncio di gobierno pa adapta e deficit riba presupuesto 2021, cu lo ta alrededor di 12% di GDP envez di 15% cu a calcula anteriormente. Esaki lo resulta den un mehoracion tal di entrada di gobierno, cu e deficit lo ta Afl. 103 miyon menos.

Gobierno den su Nota van wijziging di presupuesto ta tuma e scenario optmista di Departamento di Asunto economico, Comercio y Industria (DEACI) como punto di salida, cu ta un crecemento di 10,9 porciento di GDP nominal na 2021, loke lo significa un GDP nominal di Afl. 5077, segun calculacion di DEACI.

Pero, cu cinco luna di aña disponible te awor den cifra, cuanto e avance aki ta, y den ki categoria? Bon Dia Aruba a reuni e datonan di ingreso di gobierno di e promer cinco luna di aña y a compara esakinan cu aña 2019 y 2020. Esaki pa algun item cu por considera indicador importante di con actividad economico ta bayendo.

BBO/BAVP

LAYOUT PLEASE PONE TABEL 1 AKI

BBO/BAVP, cu ta aparece den e datonan di Banco Central hunto, ta na 73,7% di loke esaki tabata den promer cinco luna di 2019. E mesun periodo di 2020 tabata un poco mas halto, na 80,6% di e periodo similar di 2019. Esaki naturalmente influencia pa e promer lunanan di 2020, unda ainda no tabatin crisis y e cifranan pa luna tabata duna un imagen ‘normal’ compara cu e aña anterior. Ultimo lunanan di 2021 ta mustra sin embargo un mehoracion compara cu e mesun lunanan di 2020, loke ta ser splica cu e lunanan di april y mei 2020 economia tabata den pleno pandemia, y lockdown ademas. En todo caso, na e nivel cu BBO/BAVP ta den ultimo lunanan, sigur lo tin aumento sustancial compara cu 2020. Pa yega na un average cu ta refleha e crecemento economico anticipa, lo mester drenta un averahe di 14 miyon florin pa luna pa resto di aña, y esey ta parce un nivel factible.

Invoerrechten

Impuesto di importacion ta e categoria cu mas ta duna señal di reactivacion economico, unda den e promer cinco lunanan ta mira cifra cu ta na mesun nivel pa e mesun periodo di 2020, mientras cu 2020 tabata conta cu tres luna fuerte anterior na e entrada di Covid-19 na maart aña pasa. Esaki ta refleha cierto optimismo y actividad economico, aunke tambe tin un parti di comercio cu ta cauteloso cu importacion, talvez tambe pa motibo di no ta dispone di e fondonan pa importa un paquete amplio di mercancia cu nan tabata custumbra importa.

LAYOUT PLEASE PONE TABEL 2 AKI

Loonbelasting

Entrada di loonbelasting ta indica cu empleo ainda no ta unda e tabata na 2019, y cu e aña aki ta mira e entrada di loonbelasting den e cinco lunanan transcuri na mes altura promedio cu e lunanan juni te cu december 2020, unda cu e promedio tabata alrededor di Afl. 16 miyon pa luna. Pa alcanza e nivel total di 2020 pa resto di aña entrada di loonbelasting mester subi te na alrededor di Afl. 20 miyon pa luna. Si mester refleha tambe e aumento di actividad economico manera anticipa, lo mester yega na un promedio di Afl. 23 miyon pa e restante lunanan. Como referencia: na 2019 e promedio di loonbelasting pa luna tabata riba Afl. 22 miyon. Esaki por ta un indicacion cu tin un cierto recuperacion economico andando, visible den cifra di BBO/BAVP y impuesto di importacion, pero cu esaki no necesariamente ta bay acompaña cu mes tanto aumento den empleo. Esaki por tin varios motibo. Un di nan por ta cu den e pandemia empresanan a siña opera cu menos personal cu anteriormente nan tabata emplea y a adapta na e realidad nobo aki.

LAYOUT PLEASE PONE TABEL 3 AKI

Den e loonbelasting tin naturalmente tambe e efecto positivo di e subsidio di salario, cu alavez ta indica cu hopi negoshi ainda no por afford pa laga e subsidio aki bay. Por lo tanto tambe e decision pa extende e subsidio por lo menos te fin di 2021. Sin embargo, lo ta util si por a haci investigacion na e relacion actual entre recuperacion economico y productividad laboral, den curso di e aña aki, y e proximo, pa averigua si en berdad nos economia ta cuminza haci uso di labor na un manera diferente.

Resumiendo, por bisa cu e cifranan ta mustra cu e recuperacion anticipa ta factible, pero cu esaki no necesariamente lo trece cune un aumento proporcional di empleo.