Mayoria cu a haya carta di recordatorio di Web a reacciona y a paga

E fin di siman tras di lomba, diasabra, Web a manda un recordatorio di pago pa mas o menos 2000 persona. E personanan aki tin un cuenta di awa di cual e fecha a vence caba. Esey ta e grupo cu a haya recordatorio y di cual e siman aki mayoria a reaciona y a pasa paga esaki caba, Segun Asja Dongen vocero di Web a splica. Locual cu ta hala atencion den e situacion aki ta e cantidad di hende cu diripiente a core bay paga nan cuenta cu por ta un indicacion cu kisas hende tin placa pa paga e recibo, pero ta opta pa no pag’e como cu nan awa den e caso aki no ta wordo kita. A puntra Sra. Dongen kico Web mes ta saca for di esaki, den cual el a bisa cu esey ta e impresion cu Web ta haya. “Tin un grupo grandi cu tin e custumber di paga te ora cu nan haya un recordatorio, pues nan ta warda te ora cu nan haya e cartamara na nan meter di awa bisandonan cu tin un cuenta atrasa y pa por fabor pasa paga esaki. Anto cu e ora ey numa nan ta bay paga nan cuenta di awa.” Segun Sra, Dongen esaki at keda na cada ken su responsabilidad si nan kier pa e yega asina leu of no. Sinembargo e impresion ey Web tin door cu ta mayoria cu tabatin e debe y cu a haya e carta, ya a pasa paga esaki.

Un grupo chikito di esunnan cu a reaccion a indica cu nan no por paga pues esunnan ey a haci un peticion na Web pa un areglo di pago. “Esey ta algo cu ta tuma mas tempo, pa evalua si ta honra e peticion of no den cual ta wak e circumstancianan di e persona manera su entrada entre otro, Sra.Dongen a bisa.