Prome Minister Evelyn – Wever Croes a presenta un update di e proceso di formacion di Gobierno di Aruba cu ta andando. Comunidad por a tuma a traves di medionan di comunicacion cu tin diferente reunion tumando luga entre miembronan di partido MEP, Raiz y stakeholders di diferente sector na Aruba. E reunionnan aki ta forma parti di e proceso pa yega na e acuerdo di gobernacion.

Prome fase di formacion

Den un comunicado di prensa, Premier Wever – Croes a splica cu e prome fase den e proceso di formacion di Gobierno ta encera cu mester yega na otro pa e acuerdo di Gobernacion, pa cual ta yegando na otro riba liñanan grandi, sinembargo ta wardando pa e reunionnan cu stakeholders finalisa pa inclui nan puntonan tambe den e acuerdo. Hunto cu coleganan di partido Raiz y di partido MEP a reuni te cu aworaki cu 35 stakeholders. Esaki den cuadro di e instruccion ‘formatie opdracht’ di Gobernador.

Secuencia di proceso pa yega na formacion

Unabes cu e reunionnan conclui, e siguiente fase ta encera cu lo reparti e ministerionan entre partido Raiz y partido MEP pa por cumpli cu e acuerdo di gobernacion cu ta trahando riba dje.

Siguientemente, unabes cu sa cua ministerionan cada un partido ta haya, e ora ey cada partido lo bay haci proposicion pa cantidatonan pa minister pa ocupa e funcionnan ey.

Despues di e proposicionnan aki, e proceso di screening pa minister lo cuminsa segun e landsbesluit cu tin desde september 2013.

Segun Premier Wever – Croes: “E proceso aki ta tuma su tempo y no por apresura esaki. Como formador, ora cu mester screen un cantidad grandi di persona, e ta tuma mas tempo tambe pa haci y mester por haci esaki den trankilidad.”

Despues cu e pasonan aki tuma luga, por bisa cu tin un Gobierno forma y ta cla pa bay over na huramentacion.

Pa finalisa Prome Minister a expresa cu e ta dificil pa indica cuanto tempo tur esaki lo dura (teniendo na cuenta e proceso cu mester encamina), pero ta trahando duro riba tur e aspectonan aki pa por tin un bon acuerdo di Gobernacion y e miho Gobierno cu por ofrece na Aruba. Ta remarca cu tur e reunionnan cu stakeholders ta bayendo hopi bon y no tin ningun descordia entre partidonan Raiz cu MEP y tampoco den partido MEP (contrario na rumornan cu ta circula).

“Mi ta hopi agradecido na e confiansa cu pueblo a duna nos partido y nos lo demostra di no defrauda e confiansa ey,” Premier Wever – Croes a termina bisando.