Asina a keda conoci ora cu parlamentario Gerline Croes a duna un declaracion pa splica cu su persona ayera mainta for di trempan el a asisti na e reunion aki na parlamento pa trata e presupuesto di e aña aki cu tin 11 luna di atraso.
Croes a trece dilanti cu su coleganan di partido na un momento precies a sali for di e sala pa atende un protesta cu tabatin pafo di parlamento di werksternan, ora nan a drenta den e sala pa firma e lista di presencial e cual segun el a sigura tabata e unico documento disponibel pa firma, na momento cu himno di Aruba a caba el a conta cu presidente di parlamento Edgar Vrolijk a indica cu el a cera e reunion di e prome tanda pasobra no a firma e lista di orador, e cual no tabata disponibel segun loke el a sigura.
“Mi ta kere ta hopi anti-democratico den e forma cu kier a purba hunga un wega politico y silencia lo cual ta oposicion di Aruba”, Croes a expresa.
Tambe el a trece dilanti cu na momento cu un otro colega di otro fraccion politico a lanta y a protesta contra esaki, a resulta cu e lista aki “tabata scondi” pero asina e presidente di parlamento a informa cu e no lo duna e oportunidad pa habri e tanda back. Despues nan a haya e oportunidad ora e tanda a habri di nobo pa hiba palabra, den caso di Croes, el a sigura cu ta su deber pa sali na defensa di e comunidad cu tabata protestando y bisa kico a pasa ayera ora el a informa otro medio di comunicacion di loke a tuma luga
