(AP) — Rusia diaranson exitosamente a lansa un modulo di laboratorio pa Stacion Espacial Internacional ISS, cu tin meta pa duna mas espacio pa experimentonan cientifico y espacio pa e tripulacion.
E raket Proton-M booster cargando e modulo Nauka a despega segun schedule pa 7:58pm ora local for di facilidad di lansamento espacial Ruso na Baikonur, Kazakhstan. E antena di nabegacion y aparatonan solar a lansa adecuadamente despues di un lansamento perfecto cu a pone e modulo riba un biahe di ocho dia na e ISS.
Despues di un serie di maniobra, e modulo di 22 ton ta programa pa mara na e Stacion Espacial Internacional den modo automatico riba dia 29 di juli proximo.
E lansamento di Nauka, tambe yama e Modulo di Laboratorio di Proposito Multiple, a sufri varios retraso pa problemanan tecnico. Inicialmente tabata programa pa despega na 2007. Na 2013, expertonan a haya contaminacion den su sistema di fuel, resultado den un reemplaso costoso y un proceso largo. Otro sistemanan di Nauka tambe a pasa den modernisacion of reparacion.
Un lansamento anteriormente programa pa dia 15 di juli a keda posponi te ayera pa motibo di necesidad di drecha fayonan no specifica. Prome cu Nauka yega e stacion, un di e modulonan Ruso mas antiguo, e compartimento di caminata espacial Pirs, lo mester wordo elimina pa libera espacio pa e modulo nobo.
Controladornan espacial Ruso tin plan pa ehecuta e maniobra diabierna despues cu nan check y confirma cu sistemanan di Nauka ta opera adecuadamente y e module ta cla pa embarca.
Miembronan di tripulacion Ruso riba e stacion a haci dos caminata espacial pa conecta cablenan den preparacion pa yegada di Nauka. Unabes cu Nauka yega e stacion, lo rekeri un serie largo di maniobra, incluyendo hasta 11 caminata espacial cuminsando na inicio di september pa prepara esaki pa operacion.
ISS actualmente ta opera pa astronautanan di NASA, Mark van de Hei, Shane Kimbrough y Megan McArthur; Oleg Novitsky y Pyotr Dubrov di corporacion espacial Ruso Roscosmos; astronauta di Agencia di Exploracion Aeroespacial Hapones, Akihiko Hoshide; y astronauta di Agencia Espacial Europeo, Thomas Pesquet.
Na 1998, Rusia a lansa e prome modulo di e stacion, Zarya, sigui na 2000 pa otro modulo grandi, Zvezda, y tres modulo mas chikito den e siguiente añanan. E ultimo di nan, Rassvet, a yega e stacion na 2010.
