E famia di Mitch Henriquez a cuminsa cu e procedura pa logra persecucion di tur 5 agentenan policial cu tabata envolvi den e aresto mortal di Mitch.
E procedura a cuminsa oficialmente na Den Haag segun e abogado di famia.
Mitch Henriquez a fayece na 2015 despues di agresividad exagera di parti di e agentenan durante su aresto. Ora cu el a bay for di tino, e agentenan no a percura pa el a haya atencion medico, consecuentemente el a fayece e dia siguiente na hospital.
Husticia ta persiguiendo 2 di e agentenan actualmente. Nan mester presenta dilanti hues na april. Pa forsa e persecucion di e otro 3 agentenan, abogado Richard Korver a cuminsa procedura di articulo 12.
Segun e abogado, tin base pa persigui e otro 3 agentenan pa homicidio. Tur 5 agente mester, si ta pa e famia, wordo persigui pa laga Mitch Henriquez na un forma indefenso.
Sr. Korver ta spera cu e procedura di articulo 12 lo wordo trata e aña aki ainda.
