Pa 2017 Camara di Comercio ta keda enfoca riba e centro di Oranjestad y specialmente Caya Betico Croes. Esaki pasobra segun e presidente nobo di Camara di Comercio, Ernst Mohamed, Caya Grandi ta keda un problema.
Nan tin un comision pa atende cu e situacion di Caya Grandi, asina Sr. Mohamed ta conta. E ta indica cu nan tin cu atende cu e asunto. Aña pasa e directiva a sinta cu e grupo di Caya Grandi y a scucha nan. Camara di Comercio kier a trece e grupo cu gobierno hunto pa asina nan por soluciona e situacion, segun Sr. Mohamed.
“Caya Grandi ta un problema y Caya Grandi ta keda un problema. Personalmente e ta un tiki lamentabel cu el a bay atras asina. Pero bo por conta cu 2017, nos Camara di Comercio lo haci todo por todo. Zorg p’e comercio, no Caya Grandi so, sino ful Aruba lo florece.” Nan a cuminsa traha riba un plan y ora cu esaki keda cla, Camara di Comercio lo trece esaki dilanti.
Competencia pa Caya Grandi
Caya Grandi tin diferente competencia, segun e presidente, manera e mallnan rond Aruba. Sr. Mohamed ta kere cu tur hende por mester adapta na e cambionan cu tin. “Tin hende ta papia di Caya Grandi di antes, pero aworaki nos ta bayendo den 2017. Temponan a cambia.” Tin mallnan chikito cu ta habri tur caminda, e ta splica. E grupo di Caya Grandi mes hunto cu otro instancianan, mester wak con nan ta bay profila nan mes, segun e, y na ki direccion nan kier bay pa nan por competi cu e mallnan.
