(AP) – E hefe di e World Health Organization a admiti cu e tabata hopi prematuro ora cu nan a dicidi di descarta un coneccion potencial entre e pandemia di COVID-19 cu un escape di laboratorio, y a bisa riba diahuebs cu e lo ta pidi China pa ta hopi mas transparente cu e cientificonan investigando e origen di coronavirus.
Den un momento poco comun, compara cu e manera cu normalmente e hefe aki ta dirigi su mes na e miembronan poderoso di e paisnan, e director general di World Health Organization Tedros Adhanom Ghebreyesus a bisa cu pa yega na acceso di datonan sin ningun tipo di modificacion ta un desafio pa e ekipo internacional cu a biaha na China anteriormente den e aña aki pa investiga e origen di COVID-19. E prome casonan humano a ser identifica den e ciudad Chino yama Wuhan.
Tedros a conta e reporteronan presente cu e agencia di salud U.N basa den Geneva ta “pidiendo China pa ta transparente, habri y coopera, specialmente pa cu e informacion y datonan sin modificacion cu nos a pidi na comienso di e pandemia.”
Segun Ghebreyesus tabatin un “empuhe prematuro” di descarta e teoria cu e virus lo a por a escapa di un laboratorio di Gobierno Chino na Wuhan, cual tabata de acuerdo cu World Health Organization su mesun reportahe haci den maart, cual a conclui cu un escape di laboratiorio “tabata poco posibel.”
“Mi tabata un tecnico di laboratorio mi mes, y mi ta un persona studia den inmunologia, y mi a yega di traha den laboratorio. Mi sa cu accidentnan por pasa den laboratioro.” Tedros a comenta, “E ta bastante comun.”
Den lunanan reciente, e idea cu e pandemia a cuminsa den un laboratorio, y probablemente tabata envolvi cu un virus traha, a gana hopi enfoke y specialmente mirando cu President Joe Biden a ordena un reviso di Merca su intelligencia pa por assesora e posibilidad den mei.
China a contesta agresivamente, argumentando cu e intentonan di conecta e origen di COVID-19 na un laboratorio tabat politicamente motiva y a sugeri cu e brote por a cuminsa fuera di Wuhan. Na World Health Organization su reunion annual di ministernan di salud, China a bisa cu e buskeda den futuro di e origen di COVID-19 mester sigui, pero den otro pais.
Mayoria di e cientificonan ta sospecha cu e coronavirus a origina den vleermuis, pero e ruta exacto unda cu el a bula di e bestia pa hende, sea via un animal intermediario of via otro manera, te ainda no a ser determina. Tipicamente e ta tuma decada pa por yega na e origen natural di un virus cu a cuminsa den un animal, manera Ebola of SARS.
Tedros a bisa cu “controla loke a pasa, specialmente den nos laboratorionan ta hopi importante” pa por yega na saca afo si e pandemia tin algun vinculo cu e laboratorio.
“Nos tin mester di informacion, informacion directo tocante cual e situacon di e laboratorio aki tabata prome y na comienso di e pandemia” e hefe di World Health Organization a declara, agregando cu China su cooperacion ta un necesidad critico. “Si nos por yega na informacion completo, nos por exclui e coneccion cu e laboratorio.”
Durante e pandemia, Tedros den varios ocasion a elogia China pa su velocidad y transparencia aunke otro oficialnan Chino di World Health Organization internamente tabata kehando pa cu China.
Aña pasa, The Associated Press a haya sa cu World Health Organization tabata frustra cu e falta di detaye di parti di China durante e prome etapanan di coronavirus su plamamento y a demostra cu China tabata scondiendo algun informacion den e buskeda di e origen di e pandemia.
