(AP) — Autoridadnan den un provincia central Hulandes a haci apertura di loke nan ta considera e caminda solar pa bicicleta di mas grandi na mundo diaranson ultimo, mesclando energia sostenibel cu biahe liber di emision.
Studiantenan di un scol basico local tabata e promenan pa core riba e caminda di 330 kilometer di largura, ubica den e village Maartensdijk, cerca di Utrecht. E ta construi di bloki di concret prefabrica cu un capa transparente riba dje cu ta duna proteccion y ta permiti luz solar pa yega na e celnan solar den e blokinan.
E proyecto piloto tin meta pa establece si camindanan di dobel uso asina por ser usa mas ampliamente pa crea energia solar y sirbi ciclistanan, mientras e provincia di Utrecht ta busca pa reduci su emisionnan di carbon.
“E ta hopi importante. Nos kier ta neutral pa cu clima na 2040, y djey bo mester tribi di usa innovacion, y esaki ta hopi innovativo”, segun Arne Schaddelee, un oficial provincial, a bisa. “Nos tin un provincia hopi yen sin hopi espacio, y pa e motibo aki mester purba uso dobel. Pues si por usa caminda pa genera energia, tin un bentaha dobel.”
E caminda solar pa bicicleta a wordo lansa riba e dia cu Union Europeo a revela legislacion amplio nobo pa yuda cumpli su promesa di reduci emisionnan di e gasnan cu ta causa kentamento global cu 55% den e decada aki, incluyendo un plan controversial pa cobra impuesto na companianan stranhero pa e contaminacion cu nan ta causa.
Caminda solar pa bicicleta ya ta den uso na otro partinan di Hulanda. E caminda cu a inaugura diaranson ta esun di mas largo cu a desaroya te awo, segun oficialnan di provincia Utrecht a bisa.
Un di e ciclistanan mas jong pa test esaki, Machiel van Leeuwen di 11 aña di edad, a duna su aprobacion. “E ta miho pa medio ambiente, y mi ta prefera di tin panel solar den e caminda di bicicleta cu riba campo”, el a bisa.
