Auditoria General di Aruba a investiga otorgamento di subsidio na 2018

Pais Aruba a duna 59,6 miyon na subsidio na 2018. Pero e proceso di dunamento di subsidio no a cana completamente segun un manual cu Gobierno a laga produci na 2016. Esaki ta locual a keda publica den e rapport “Bista riba Subsidio’ di Auditoria General di Aruba, esta Algemene Rekenkamer Aruba, ARA cu a haci un investigacion riba otorgamento di subsidio publico.

E fondonan aki a bay pa instancianan di interes publico, cu no ta enseñansa, transporte of huur. E subsidio na e instancianan aki ta 28 porciento di e suma total na subsidio. Ta duna subsidio pa cierto actividad por tuma luga cu ta yuda realisa obhetivo di maneho di Gobierno. Pero pasobra subsidionan aki ta fondo publico, Gobierno mester tin control riba e proceso di subsidio.

E proceso di subsidio ta conoce risico inherente, segun ARA, manera maluso y uso incorecto di e fondonan cu consecuencia cu e placa cu a duna na subsidio no ta keda maneha na forma efectivo, eficaz of hasta legal. P’esey a importante cu tin momento di control y instrumento di supervision cu mester keda aplica consistentemente.

For di investigacionnan anterior, tanto di ARA como otro instancia a mustra cu no a mitiga e risiconan suficientemente. Esaki a keda ilustra entre otro pa motibo cu no tin un bista riba e prestacion di e instancia cu a ricibi subsidio, no tin control financiero riba otorgamento y pago di subsidio, y tin falta di factura final. E fayonan aki ta dificulta maneho di fluho di subsidio y ta casi imposibel pa Aruba por determina si a logra obhetivonan.

Aruba a introduci un cuadro di responsabilisacion nobo cu mester a mehora e proceso di subsidio y garantisa e metanan.

Mitiga risico

E rapport di ARA riba subsidio a dirigi momento di supervision y control ora di pidi, otorga y responsabilisa e subsidio. Ta puntonan pa garantisa e legalidad, efectividad, eficacia di e dunamento di subsidio, pa asina mitiga e risiconan.

A mantene na tres pregunta cu ta cua ta e garantianan den e proceso di subsidio pa supervision y control; ta cumpli cu e procesonan; y cua ta e posibel risiconan di efectividad di e dunamento di subsidio.

No solamente a entrevista e Ministerionan cu ta duna subsidio, pero tambe direccionnan cu ta ricibi fondo y tambe e Bureau di Coordinacion di Subsidio di Gobierno, CBOS. E direccionnan di maneho ta e instancianan cu ta duna Minister conseho a base di plannan di maneho, stipulacion di obhetivo y liñanan di guia.

Analisis di 15 instancia cu a ricibi subsidio

A purba haya un bista con ta cumpli cu e proceduranan basa riba observacion di 15 organisacion, di e total di 48, cu hunto a yega na 86.1 porciento di tur subsidio otorga na 2018, cu tabata 59.574.528 florin. E 15 organisacionnan a ricibi 52.774.728. E Ministerio cu mas a duna subsidio na 2018, tabata di Turismo, Salud y Deporte pa un total di 31.968.600 florin. E fondonan a bay pa DVG, IBISA, Bureau Ondersteuning y Cuido di Adiccion. Ministerio pa Asuntonan Social y Labor a saca 15.158.228 na subsidio, mientras cu Ministerio di Ordenanza Espacial, Infrastructura y Medio Ambiente a subsidia Direccion di Naturalesa y Medio Ambiente cu 2.442.200 na 2018. Direccion Cultura a ricibi 2.144.900 di Ministerio di Finanzas, Economia y Cultura y Ministerio di Husticia a subsidia Voogdijraad cu 1.060.800 florin.

Manual di subsidio ta e base pa duna placa

E determinacion legal di exigencianan ta importante pa cumpli cu e exigencianan pa por ricibi subsidio. E ‘stakeholders’ e ora ta legalmente obliga pa actua di forma cu ta limita risico.

E pregunta tabata si a sigui e liña di guia cu a formula na 2016 den un manual, cu ta inclui un programa di exigencia pa ricibi subsidio. Ley mes no ta menciona e programa aki y

ARA a constata cu unicamente DVG a cumpli cu e manual pa pidi subsidio, y e otronan cu ta cay bou Ministerio di Turismo, Salud y Deporte no.

DNM a compila su propio programa di exigencia, y no e despacho di Minister pa Ordenanza Espacial, Infrastructura y Medio Ambiente. Sinembargo e proceso a keda pega pa motibo cu DNM no a haya ayudo di experto specialisa den yena e programa di exigencia. Voogdijraad tambe a traha su propio programa di exigencia y no e Ministerio.

Direccion pa Asuntonan Social no a haci uso di e programa di exigencia manera ta stipula den e manual di subsidio, pasobra Ministerio di Asuntonan Social y Labor a dicidi cu e subsidionan ta basa riba plan di maneho di e Minister.

Locual ARA a saca afo ta cu hopi di e stakeholders, esta esnan cu ta ricibi subsidio ta considera e exigencianan pa subsidio dificil pasobra mester inclui proyeccion kico e inversion lo produci cu ta nifica cu mester evalua y midi e resultado. Pa algun sector, sigur esun di cuido, e ta dificil pa midi e resultadonan a corto plazo.

Obhetivo di un subsidio

E programa di exigencia mester ta basa riba obhetivo di maneho di Ministerionan. Cinco di e siete direccionnan, esta DNM, DVG, Direccion Asuntonan Social, Direccion di Cultura y Voogdijraad a basa nan obhetivo riba e meta stipula pa nan Ministerionan. Pero ARA a constata cu pa Deporte y Cuido di Adiccion no a formula obhetivo. Esaki ta nifica cu no tin un base pa e programa di exigencia.

Ademas ARA a constata cu e falta di 13 programa di exigencia, siete di e peticionnan pa subsidio ta basa riba obhetivonan cu ta mara den plan di maneho a largo plazo. Ta referi na programa di Gobierno cerca cuater instancia y pa uno, e obhetivo ta desconoci, pasobra no tin un decreto nacional traha pa esaki.

Un otro exigencia, conforme e manual, ta cu mester publica e programa di exigencia den Landscourant. ARA a constata cu Gobierno no a publica nada na 2018. Ademas ARA a topa cu tres peticion di e 15 instancia na CBOS, y a resulta cu seis peticion no a pasa via e Bureau di Coordinacion di Subsidio di Gobierno, sino cu nan a bay directamente na despacho di e Minister concerni. Pues ARA no por a determina si e peticion tabata evalua pa CBOS riba e criterianan cu nan mester ta completo y legal. E instancia falta un lista di control ademas di archivonan (dossiers). Es mas pa 2018, CBOS no por a presenta ningun dossier y ARA no por a saca afo si a evalua e peticionnan formalmente. Ademas, CBOS ta usa un formulario standard pa peticion cu e decreto nacional ta exigi. Pero hasta e forma con ta duna contenido na e formulario aki mester keda midi y e investigacion di ARA a mustra cu ningun di e direccionnan a tene un revision substantivo.

SDG 16, exigencia pa transparencia

ARA ta considera e tema di importancia como tal a ehecuta un investigacion di enfoke, cu ta limitativo na un pregunta specifico. E rapport no tin conclusion ni tampoco recomendacion y a keda presenta na e Ministernan encarga y tambe na Parlamento. E ta keda na Parlamento pa haci su preguntanan. Manera Bon Dia Aruba a mustra anteriormente, Parlamento nunca a trata e rapportnan aki, a pesar di diferente peticion di parti di ARA. Punto ta cu ARA a haci e investigacion pa Parlamento haya informacion y compronde kico ta pasando. E rapport mes no ta duna opinion riba e legalidad di e subsidionan, pero esaki lo ta inclui den Cuenta Anual di 2018.

ARA a bisa cu door di duna bista riba e supervision y momento di control den e proceso di subsidio, ta contribui na mehoracion di e proceso y asina tambe, na desaroyo di instancianan efectivo, responsabel y transparente cu ta den liña di e meta 16 di e Sustainable Development Goals, SDG, cu Aruba a adopta.