“Pa hopi aña dialogo ta andando cu Directie Financien y te cu awo, ainda nos no a ricibi nada.”

Pa hopi aña e problema di trato medico na personanan indocumenta na nos isla ta crece cada dia mas. Den un entrevista cu Jacco Vroegop, presidente di e hunta directivo di hospital, y Gregory Croeze, director financiero di hospital, nan ta a splica con e problema aki ta afecta cuido medico di Aruba.

Desde cu e pandemia di COVID-19 a cuminsa aña pasa, e trato medico pa personanan indocumenta a aumenta na hospital, y esaki ta nifica tambe un aumento substancial di gastonan pa hospital. “Durante e pandemia nos tabatin un gasto promedio di mas o menos 200 mil florin pa luna na cuido medico pa ilegalnan”, Sr. Vroegop a bisa.

Segun Vroegop algun di e motibonan pakico e gasto ta asina halto ta entre otro “paso ilegalnan tin miedo di wordo deporta, of nan tin e manera pa bishita un dokter di cas cu ta cobra cash pa atende nan, nan ta warda hopi tempo pa finalmente bay dokter y nan ta bin hospital ora cu nan no por wanta mas y e ora nan mester di hopi mas tratamento paso nan ta bin mucho laat”. E ta menciona tambe cu e cuido pa COVID-19 ta caro riba su mes, y si agrega e gasto extra cu tratamento pa un persona indocumenta tin, e gasto ta subi mas.

“Nos a mira tambe den ultimo dos añanan un aumento den nacemento di baby entre personanan indocumenta, y den temporada di covid esaki aumenta significantemente, y esey ta hendenan cu nos no por rechasa. Pa personanan indocumenta, nos ta purba di no duna nan tur e mesun tratamento cu nos ta duna nos mesun poblacion, dus solamente cuido necesario, pero na final e ta un suma grandi toch”, Vroegop a agrega.

Segun un tratado internacional, gobierno di Aruba mester cubri e gastonan medico di hospital pa personanan indocumenta, Sr. Croeze a splica un poco mas tocante e comunicacion y acuerdo cu hospital tin cu e gobierno di Aruba ariba e topico aki.

“Pa un periodo largo caba, e ministerio di husticia tin un pot cu ta destina pa personanan indocumenta. Nos tabata den dialogo cu Directie Financien, eigenlijk nos ta manda e facturanan pa ministerio di husticia y nan ta manda nan pa Directie Financien pa nan paga nan. Pa hopi aña e dialogo ta andando cu Directie Financien y te cu awo ainda nos no a ricibi nada. Nos tin un balans habri di alrededor di 12 miyon florin. Nos kier resolve e balans aki y durante e ultimo contacto cu Directie Financien nan a informa nos cu nan tambe kier resolve e balans, pero nan mester tin tur documento na ordo, y esey nos ta bezig cune aworaki paso nan mester controla si e pashent en berdad tabata na Aruba y a ricibi e cuido medico”, Croeze a bisa.

Den algun caso hospital ta yega na un areglo di pago cu algun di e personanan ilegal cu ta ricibi cuido medico, pero e sistema aki hopi biaha no ta na beneficio di hospital. “Si e balans ta por ehempel 100 mil florin, y bo yega na un acuerdo di pago cu un persona cu ta gana salario minimo, e persona por paga solamente 50 of 60 florin pa luna y e ora ey e lo dura 30 aña por ehempel pa nan paga, dus eigenlijk e no ta sostenibel si e persona bay y nos no tin grip riba e personanan”, Croeze a agrega.

Sr. Vroegop ta splica tambe cu pa motibo di cortamento di parti di e pais, e tipo di sumanan aki ta importante pa hospital. “Pa motibo cu nos mester cubri e gastonan aki, nos no por ofrece un bon calidad di cuido na nos mesun poblacion. Pa hopi aña esaki ta un problema y aworaki e problema ta bira mas grave paso nos no tin e financiamento mas, y gobierno mester eigenlijk, segun e tratado internacional, cubri e gastonan aki” el a bisa.

Gobierno di Aruba no ta dunando un contesta definitivo y concreto pa resolve e debe aki, Sr. Croeze ta bisa cu “si nan no por paga e debe ora nos por resolve cu debe cu hospital tin cu pais Aruba, nos tambe tin debe cu pais Aruba, pero e debe di pais Aruba pa hospital ta mas grandi”.

E problema di refugiadonan indocumenta ta sigui crece dia pa dia, esaki ta trece problema pa hospital tambe, y Sr. Vroegop ta spera cu por bin un cambio pronto. “Nos tin cada biaha menos placa, y esey ta un problema cu ta keda crece pa nos tambe, y realmente nos ta spera cu e gobierno nobo por tuma e problema aki mas na serio, asumi e tratado internacional, y no na costo di e pueblo Arubiano” el a bisa.