(LaPatilla) – E agencia internacional di energia a duna di conoce e data di prijsnan di energia 2021 cu un recopilacion realisa aña pasa, cual ta destaca cu e pais cu e gasolin mas barata di mundo aworaki ta Iran cu un tarifa di 32 cen di dollar pa un liter sigui pa Argelia cu un prijs di 35 cen di dollar pa e mesun cantidad, y di e manera aki nan pasa Venezuela cu te cu aña pasa tabata e nacion caminda practicamente gasolin pa vehiculonan tabata wordo regala.
“Na 2020 e prijs promedio mundial di gasolin na pomp tabata di 81 cen di dollar pa liter, un rebaho di 11% compara cu e aña anterior debi principalmente na un caida fuerte di e prijs di petroleo durante e prome semester di 2020, durante e pandemia di COVID-19”, e AIE ta señala. “E nivelnan di prijs a varia grandemente entre paisnan debi na hopi factor, pero e principal tabata cu e pais mester ta exportado di petroleo of importado di combustibel”, Petroguia ta señala.
Iran, Argelia y Venezuela ta forma parti di e Organisacion di Paisnan Exportado di Petroleo (OPEP) caminda segun e informe di AIE nan ta domina un rango di prijs entre 30 y 40 cent di dollar pa liter, cu e excepcion di e ehempel Venezolano, cu aworaki ta mustra un prijs di 60 cen di dollar pa liter, cu ta surgi manera promedio entre e prijs subsidia di 5.000 bolivar (cero dollar), e referencia internacional di 50 cen di dollar cu a keda estableci na juni di aña pasa y cu di manera no formal mester paga 3 y mas dollar pa liter principalmente den zonanan fronteriso.
E prijs di Venezuela, sinembargo ta persisti como esun mas abou di America Latino si e wordo compara cu esun di Colombia cu segun AIE e ta na 26 cen di dollar, esun di Brasil ta 82 cen di dollar of esun di Argentina, Paraguay y Uruguay caminda el a yega 80 cen, 92 cent y 1.56 dollar. Na Mexico e ta na un dollar.
E rapport ta señala cu e paisnan cu e gasolin mas caro di mundo ta Finlandia (1.71 dollar), Grecia (1.65 dollar), Iceland (1.63 dollar) y Noruega (1.56 dollar) pa liter.
