(TMZ) – Sha’Carri Richardson ta perdiendo di un gran oportunidad di por participa na e Olimpiada di e aña aki, pero esaki a habri un porta na un oportunidad un poco controversial pa su persona.

E administracion di Dr. Dabber, cual ta un organisacion cu ta specialisa den tur locual tin di haber cu marihuana, a extende un oferta na e sprinter popular di Merca, cu un oportunidad cu lo paga bon y no ta rekeri di hopi labor fisico.

Dr. Dabber ta ofrece Sha’Carri e oportunidad di bira embahador di e organisacion, cual den e organisacion tin e titulo di “doctor” pa medio di un carta dirigi na Richardson.

E oferta di Dr. Dabber pa e posicion di ‘doctor’ ta ofreciendo Richardson 250,000 dollar pa e posicion aki, cual ta inclui e responsabilidad di vocero, pero tambe di test e productonan cu Dr. Dabber ta lansa.

E compania ta bisa de su oferta “Considerando bo talento y gracia durante e ultimo simannan aki, ta nos deseo ofrece bo persona e oportunidad di traha cu nos ekipo como vocero di DR. Dabber. E trabao aki ta consisti tambe di test nos productonan, como un dokter residente.”

Te ainda no a keda cla con largo e contract aki lo dura, pero loke si ta keda cla ta cu e ta un bon oportunidad pa Sha’Carri por gana placa, y na mesun momento ta manda un mensahe na e Olimpiada pa cu e descualificacion pa motibo di un resultado positivo.

Anteriormente a ser reporta cu Sha’Carri a test positivo pa HTC, cual ta un componente encontra den marihuana. E test aki a bini na mesun momento cu e competencia pa por cualifica pa un posicion den e ekipo cu lo representa Merca na e Olimpiada, competencia cu Richardson a gana, mas pa motibo di e resultado positivo di e test, a causa cu su victoria a ser descualifica y haci nulo.

Ademas di e descualificacion, tambe a ser imponi un suspencion, cual lo a caba prome cu e Olimpiada tuma luga, sinembargo, Merca su ekipo di Track & Field a dicidi di no permiti Sha’Carri participa na e Olimpiada.

Te ainda no ta ser conoci si Sha’Carri lo acepta e oferta aki of no.

Dr. Dabber tabata den noticia anteriormente tambe, pa motibo cu Kyle Massey, ken anteriormente tabata vocero di Dr. Dabber a ser kita di su posicion debi na alegacionnan haci den su contra, y e huicio cu tambe a tuma luga acusando Massey di manda imagennan explicito na un menor di edad, y conducta inapropia cu un menor.