(TMZ) – Britney Spears a dicidi ken e kier como su abogado den e caso di conservacion. E abogado a acepta y lo aparece den corte riba diaranson, argumentando cu Britney tin derecho di tin e abogado di su escogencia.
Nos a reporta e storia tocante e hecho cu Britney a firma documentonan legal declarando su deseo di contrata e compania grandi di abogado Greenberg Traurig, LLP como parti di su intento pa saca su tata Jamie Spears di e conservacion. Su prome paso pa eventualmente por caba cu e conservacion en general.
Manera revela anteriormente, Britney a enfoka riba contrata un abogado cu ta forma parti di e compania aki, fiscal federal Mathew Rosengart, ken ta representa un cantidad grandi di celebridadnan, incluyengo Steven Spielberg, Ben Affleck, Jimmy Butler y Sean Penn.
Diferente fuente cu conocemento directo ta conta TMZ cu Rosengart a acepta y lo presenta na corte durante e audiencia riba diaranson pa un momento pa asina por pidi e hues pa acepta su persona como e abogado.
E problema ta sinta cu Britney no por firma ningun contract en absoluto sin e aprobacion di su conservador, ken ta Jamie Spears, e mesun persona cu e kier saca for di e conservacion.
Rosengart su argemento ta cu Britney tin un derecho Constitucional pa tin e abogado di su escogencia pa representa su persona. Acusadonan den casonan criminal tin derecho constitucional na un abogado, pero un conservacion no ta un caso criminal, pero ta aki unda e oportunidad ta sinta, pa motibo cu e no ta un caso civil tampoco. E ta un combinacion di tur dos, dunando un posibilidad cu e argumento lo por ser considera.
Segun Rosengart su argumentacion, Britney tin e derecho constitucional aki, cual ta inclui e derecho di un abogado competente, y e hues lo ta un persona hopi dificil si e conclui cu Rosengart no tin e derecho legal di representa Britney. Tambe Rosengart lo argumenta cu e ta absurdo pa Jamie Spears tin e poder di escoge e abogado cu lo representa Britney, y di nenga aprobacion pa cu Britney su escogencia, mirando cu e proposito di e representacion di Britney ta pa saca su persona for di e conservacion.
E intencion di saca Jamie Spears for di e conservacion aki ta e prome paso, pa motibo cu Jamie Spears ta un di e unico personanan cu ta contra e terminacion di e conservacion. Pa motibo aki, prome cu Britney por caba cu e conservacion en general, e lo mester saca Jamie Spears for di e conversacion aki cu tin ya mas di 13 aña tumando luga.
E lucha y bataya di berdad lo bin si y ora cu tin un mocion pa caba cu e conservacion. Britney a bisa den corte luna pasa cu tabata kier esaki haci sin un evaluacion medico. E motibo dicon esaki ta haci e proceso uno dificl ta cu e hues no lo acepta e condicion aki, mirando cu tin varios profesionalnan medico cu a duna nan conseho y comentario tocante Britney durante e ananan, y tur ta conclui cu Britney tin un enfermedad mental cu ta haci e conservacion aki uno necesario.
Nos a contacta Rosengart pa algun declaracion y comentario, pero te ainda Rosengart no a papia publicamente tocante e caso aki.
