(AP) – Despues cu Dr. Ifeanyi Nsofor y su casa a ricibi dos dosis di e vacuna di AstraZeneca contra coronavirus den Nigeria, nan a asumi cu nan lo ta liber di biaha den e temporada aki na un destinacion Europeo di nan escogencia. Nan tabata fout.
E pareha, y miyones di otro personanan vacuna como parti di un intento di Nacionnan Uni, por encontra nan mes prohibi di drenta hopi diferente pais Europeo y otro paisnan tambe pa motibo cu e nacionnan aki no ta reconoce e version di vacuna aki traha na India pa biahe.
Aunke AstraZeneca ta un vacuna produci den Europa y a ser autorisa pa e continente su sistema regulatorio pa cu medicina, e mesun vacuna pero produci na India, no a ser duna aprobacion.
Reguladornan di Europa a bisa cu AstraZeneca su vacuna te ainda no a completa e documentonan necesario riba e factoria na India, incluyendo detayenan tocante su practica di produccion y control di calidad.
Sinembargo, algun experto ta describi e movida di EU aki como discriminatorio y no basa riba ciencia, destacando cu World Health Organization a inspecta y aproba e factoria aki. Oficialnan di salud ta bisa c u e situacion no solamente ta complica biahe y frustra economianan fragil pero tambe ta afecta e confiansa den e vacuna dunando algun di nan e impresion di ta bao di e calidad normal.
Mirando cu e cantidad di vacuna ta aumentando den Europa y otro paisnan cu mas recurso, autoridadnan ta ansioso di salba e turismo den e temporada aki ta relahando e restriccionnan pa cu e coronavirus na e fronteranan.
Anteriormente den e luna aki, e Union Europeo a introduci su certificado digital di COVID-19, cual ta permiti residentenan di Europa move libremente den e 27 nacionnan si nan ta vacuna cu un di e 4 vacunanan autorisa pa e agencia di European Medicines Agency, tin un resultado negativo di e test, of tin prueba di e recupera recientemente di e virus.
Mientras cu Merca y Britain ta keda mayoritariamente cera pa turistanan, e certificado di EU ta mira como un modelo potencial pa biahe den e era di COVID-19 y un manera pa por mehora economia.
E vacunanan aki promovi pa EU oficialmente ta inclui esunnan traha pa Pfizer, Moderna y Johnson & Johnson. Nan no ta inclui AstraZeneca traha na India y hopi otro vacunanan usa den paisnan cu ta desaroyando, manera esunnan traha na China y Rusia.
Paisnan di EU individualmente ta liber di aplica nan mesun reglanan di biahe tanto paden como pafo di e grupo cu ta pertene na EU, y nan reglanan ta varia bastante, creando mas confusion pa turistanan. Varios paisnan di EU, incluyendo Belgica, Alemania y Switserland, ta permiti hende drenta aunke nan tin vacunanan cu no ta promovi pa EU mientras cu hopi otronan manera Francia y Italia no ta haci esaki.
Pa Nsofor, e realisacion cu e lo por ta prohibi tabata un “realisacion fuerte.” Despues di un aña duro y largo trahando durante e pandemia na Abuja, Nsofor y su pareha tabata hopi emociona pa un descanso y vakantie Europeo cu nan dos yiunan hoben, probablemente admirando Eiffel Tower na Paris of un tour na Salszburg Austria.
Nsofor a nota cu e vacuna traha na India cu su persona a ricibi tabata autorisa pa World Health Organization pa uso di emergencia y a ser supli pa medio di COVAX, e programa pa provee vacuna na paisnan di menos recurso y cu no lo por a yega na esaki traha pa Nacionnan Uni. World Health Organization su aprobacion a inclui un bishita na e Serum Institute of India su factoria pa sigura cu nan tabatin un bon practica di produccion y e control di calidad tabata de acuerdo cu e standard.
“Nos ta gradici na EU cu nan a funda COVAX, pero aworaki esencialmante nan ta discriminando contra un vacuna cu nan a funda y promove” Nsofor a bisa. “Esaki lo duna oportunidad na tur clase di teoria di conspiracion cu e vacunanan cu nos ta haya na Africa no ta mesun bon cu esunnan cu nan tin pa nan mes.”
Ivo Vlaev, un meneer na Britain su University of Warwick, ken ta consehero di Gobierno tocante ciencia di comportamento durante COVID-19, ta di acuerdo cu e paisnan aki su negacion di reconoce vacunanan usa den paisnan di menos recurso por duna paso na desconfiansa.
“E hendenan cu ya caba tabata dudoso pa cu e vacuna, aworaki lo duda mas ainda” Vlaev a declara. “Tambe nan por perde e confiansa den e mensahenan gubernamental di salud publico y tin menos disposicion pa cumpli cu reglanan di COVID.”
Dr. Mesfin Teklu Tessema, director di salud pa International Rescue Committee, a conta cu paisnan cu a nenga di reconoce vacunanan cu ta aproba pa World Health Organization ta actuando den contra di e evidencia cientifico cu tin.
“Vacunanan cu ta bay de acuerdo cu World Health Organization su standard, mester ta acepta. Si no, esaki lo por ser mira como un elemento di racismo.” segun Teklu.
World Health Organization a urgi paisnan pa reconoce tur e vacunanan cu nan a autorisa, incluyendo e dos vacunanan traha na China. Paisnan cu dicidi di no haci esaki, ta “kitando e valor di e confiansa den vacunana cu por salba bida cu a ser comproba di ta sigur y efectivo, y potencialmente poniendo miyones di hende den riesgo” e agencia di Nacionnan Uni a bisa den un declaracion anteriormente den e luna aki.
