Departamento di Salud Publico a indica algun dianan pasa cu e cifranan di casonan di Covid-19 lo wordo anuncia pa siman, segun datonan recolecta for di 2 di juli te cu 8 di juli nan a indica cu 27 persona a contagia cu coronavirus.

Di esaki, 16 persona ta residente y 11 ta turista, loke a hiba e cifra na 33 caso activo cu un averahe di 4 caso pa dia y un positivity rate di 6%, ademas, a señala tambe cu di e casonan aki registra siman pasa 4 persona so tabata vacuna, un porcentahe di 15% di esunnan cu a haya e virus siman pasa ta vacuna.

Prome minister demisionario Evelyn Wever-Croes a sigura cu esaki por tin di haber cu e variantenan nobo, loke nan ta yama “breakthrough infections” y cu mester tene na cuenta cune, pa motibo cu esaki ta nifica un “aumento liviano, pero e ta un aumento den e cifranan” na unda el a señala cu e virus t’ey ainda y e ta keda un riesgo den e comunidad.

Si e situacion aki ta continua, di tur esunnan cu a vacuna e 15% tin e posibilidad di haya e virus, den e cifranan tambe a trece dilanti cu 5 tabata interna na hospital, 2 tabata turista, 3 local cu un 1 den unidad di cuido intensivo caminda cu a keda conoci cu tur di nan no tabatin e vacuna.

“E gran mayoria di esunnan cu ta adulto cu no ta vacuna, ta pa nan propio decision y nos como gobierno ta respeta esaki, sinembargo, e ta trece cune extra responsabilidad pa bo cuida bo mes mas y cuida bo famia aun mas” Wever-Croes a bisa.

Asina mes, el a declara cu e reglanan cu a wordo implementa pa restriccionnan di Covid-19 a wordo elimina y tambe a wordo flexibilisa medidanan pa turistanan cu ta bin for di Merca pa asina mas turista por drenta y Aruba por recupera mas lihe, pero treciendo dilanti loke a tuma luga fin di siman ultimo cu tabatin tiroteo y kiebro de reglanan cu ta bin for di personanan asocial cu no kier weita un recuperacion di e isla, el a enfatisa cu e no kier bin cu medidanan back como toque de queda, shelter in place y tur esey nan pero “si mi mester bin cu medidanan, mi ta bin cune, pasobra Aruba mester ta na prome luga”, el a finalisa.

Sharline Koolman di departamento di Salud Publico tambe a menciona cu loke a pasa fin di siman no tabata algo cu nan tabata ‘expect’ y como grupo medico nan tabata espera cu e comportacion lo por a ta mas miho, mirando cu e virus di Covi-19 ainda ta plamando den comunidad.

Di e siman for di 20 te cu 26 di juni, el a informa cu nan tabatin 60 test pa loke ta trata e variante di Delta na Aruba manera hospital a anuncia, Koolman a sigura cu di e testnan aki ningun a sali positivo pa e variante aki, esun cu a wordo origina na India.

Pa e siman di 27 di juni te cu 3 di juli, el a señala cu nan a haya 3 caso positivo cu variante Delta di 16 test cu a wordo haci y e siman di 4 di juli te cu 11 tabatin 25 test, di lo cual 8 a sali positivo cu e mesun variante.

El a sigura cu e variante aki ta esun cu ta mas contagioso compara cu e variante Alfa esun di Reino Uni, na unda cu e chens di sigui plama den comunidad ta sigui y esey no ta un bon noticia si ta mira loke a sucede e fin di siman ultimo, manera Koolman a expresa.

Como parti di Crisis Team el a bisa cu nan no por sigui keda cuida comunidad despues cu 16 luna a pasa desde cu pandemia a cuminsa, cu tur hende por compronde loke ta sigui pasa rond di mundo vooral na Hulanda na e momentonan aki y cu e variante Delta ta presente na Aruba.

“Si nos sigui cu e comportacion ey, e ta bay sigui plama mas na Aruba cu consecuencianan cu mi ta kere nos ni un no kier pasa aden un biaha mas”, el a comenta.

Nan como Departamento di Salud Publico ta mantene y monitoria e datonan y cifranan tur dia, si acaso epidemiologia ta mira cu algo no ta bayendo bon nan ta trece esey dilanti, igualmente cu laboratorio di hospital pa asina tuma medidanan pa cu esakinan.

Di loke ta trata e ‘Vacunathon Youth’ cu a tuma luga diasabra ultimo, Koolman a informa cu muchanan y hobennan entre 12 pa 17 aña sin problemanan di salud wordo vacuna, e grupo cu a haya e vacuna e dia ey ta representa casi 20% di e poblacion di e grupo di edad aki lo cual nan ta haya esey como algo hopi bon, cu ta falta mas ainda pero e ta bon un comienso.

Di loke ta trata e grupo di 18 pa 60 aña cu a vacuna, Koolman a indica cu te dialuna ultimo e porcentahe tabata na 68% di henter e poblacion di Aruba, e grupo di edad di 60 aña bay ariba ta na 73%.

El a menciona cu esaki ta hopi importante pa comunidad haya sa pa motibo cu na Aruba ta core rond e variante Delta y e cifra ey por brinda cierto proteccion, “no total, pero si e lo por yuda pa hendenan no bira malo y bay na hospital”.

E meta di vacunacion cu nan tin pa Aruba ta 85% di e poblacion, loke World Health Organization ta indica pa e motibo cu e vacuna Pfizer cu ta esun cu Aruba a haya ta cubri e persona den su mayoria contra Covid-19 pero no di un manera completo, esey ta nifica cu mas porcentahe tin di hende vacuna e ora ey e chens pa nan finalisa na hospital ta bira menos y ta p’esey cu si por logra mas hende vacuna riba e isla esey lo yuda pa cu hendenan no lo bira malo of por fayece.

Koolman tambe a papia tocante personanan cu te ainda no a vacuna, cu no a dicidi di tuma e vacuna pa via di e tempo cu esey ta tuma, pero cu si nan tin cu biaha nan lo haci’e, pa esaki el a indica cu “mi no sa si e pais pa e cual bo ta bay biaha ta mas importante cu bo famia, pero mi ta kere cu si bo tin un tata of mama hende grandi cu no por a vacuna pa whatever reason, mi ta kere cu esey ta mas importante cu ora bo ta bay biaha y bo ta bay vacuna” el a finalisa y e pa motibo ey nan ta sigui motiva e comunidad pa bay vacuna.