Dialuna mainta Minister di Husticia, Seguridad y Integracion Sr. Andin Bikker a bin Parlamento pa sondea sentimento tocante tres punto di agenda.

Uno tabata pa training di 11 personal pa KIA. E otro tabata pa training di 28 polis y materialnan incluyendo 550 bullet proof vests cu un costo di mas o menos Afl. 1,400.- cada uno y tres body scanners. Aunke tur fractie presente ta reconoce e necesidad di tanto material como training nos no por a duna un advies positivo mirando cu no tin presupuesto.

E di tres punto tabata pa tres wagon pa Brandweer cu tin un costo total di 2.7 miyon. Den su carta pa Parlamento Minister Bikker a bisa cu mirando cu no tin fondo lo por lease nan pa mas o menos 100 mil pa luna. Den Parlamento Minister Bikker a bisa cu 100 mil tabata un estimado conservativo y cu probablemente lo por logra un operational lease cu ta inclui mantencion pa mas o menos 75 mil pa luna. Un lease di 75 mil pa luna durante 5 aña ta encera un gasto total di 4.5 miyon. Esaki ta inhusitifcabel specialmente si considera cu e balor di e tres wagon nan ta 2.7 miyon. Tambe mi a puntra Minister Bikker pa cuanto tempo Aruba lo tin necesidad di lease e wagonnan ya cu mi no ta anticipa cu lo ta pa solamente 5 aña pero mi no a haya contesta ariba e parti di pregunta ey.

Ta berdad manera Minister Bikker a señala cu si cumpra e vehiculonan CAft lo mester cay aden pero esey no ta necesariamente algo malo. Mi ta sigur cu si demostra cu Aruba lo mester di e wagonnan pa sigur mas cu 10 aña no por hustifica lease nan mientras por structura un compra cu ta hopi mas economico. Ultimo Land Aruba tabata emitiendo bono local rond di 5% di interes y si nos financia e compra na e nivel ey por completa e compra pa menos di Afl 60 mil pa luna cu ta basta menos cu e lease y ta laga espacio pa cualkier mantencion inespera.

Ta di lamenta cu e supuesto futuro partnersnan di coalicion a bay di acuerdo comosifuera nada no a cambia y cu nos lo por sigui goberna nos pais di mesun manera. E ultimo 20 añanan di maneho di finansas publico destructivo no por sigui y cualkier partido cu no acepta esey lo fracasa den hiba Aruba dilanti. Mi ta warda e regeerakkord pa analisa si RAIZ a logra un compromiso pa cualkier cambio structural manera p.e. modernisacion di nos kiesverordening. Si esey no ta e caso lo ta un traicion di e un tercera parte di electorado cu a vota contra e dos partido grandinan. Ningun politico o partido ta suficiente, nos mester cambia e sistema y eleccion 2021 a brinda nos un oportunidad unico pa logra esey. Tristo cu Sr. Arends a prefera di drenta un intencion di gobernacion sin nunca sinta cu e otro partidonan cu tambe a campaña contra politica tradicional.

Mientras tanto ami lo ta den Parlamento luchando contra malgastamento di placa di pueblo y semper lo mi boga pa e solucionnan den nos plan di partido paso nan ta e mihor ruta pa hiba nos pais dilanti. Tanten tur Arubano no ta goza di comodidad financiero mi trabao no a caba.