En bista di ultimo acontecimento den fin di siman, miembronan di Crisis Team como Alto Comisario di Cuerpo Policial di Aruba, Vanessa Tjon Kock a trece dilanti cu ta “increibel pa wak cu na e prome fin di siman cu no tabatin medida na Aruba nos tabata na e forma ey pa loke ta trata orden publico”.

Tjon Kock a señala cu den e fin di siman aki diferente incidente a tuma luga rond di e isla como por ehemplo, 60 dalmento, bringamento na gran scala na diferente luganan nocturno, polis cu a wordo agredi y mester a bay hospital, entre otro.

“Mi ta haya hopi lamentabel cu un cierto momento a pidi pa flexibilisa tur medida di tur manera, a tene cuenta cu economia di Aruba, a tene cuenta cu situacionnan social y cu diferente otro factornan, pero no ta tene cuenta cu nos propio comportacion”, el a sigura.

Tambe a wordo treci dilanti cu Aruba no por keda cu e medidanan di restriccion di Covid-19 permanentemente, pero cu e situacion aki no mester ta algo cu Cuerpo Policial mester bay bisa pa e doñonan di establecimento cu constantemente nan mester tene na cuenta e reglanan, ademas el a enfatisa cu den dianan aki periodo di vakantie a cuminsa y e control di polis no ta bay stop, control policial ta bay sigui “y nos no ta bay acepta agresion den ningun miembro y den ningun forma”.

Alabes el a dirigi algun palabra pa doñonan di establecimento nocturno cu pa varios biaha ta bin den noticia pa loke ta trata aglomeracion di hende y no cumplimento di medidanan cu si nan no ta compronde kico ta pasando na Aruba na unda tur hende mester mantene nan mes na regla, nan ta bay haya mas di e casonan aki cu polis tin cu wordo agredi of luganan tin cu wordo cera.

“Nos tin cu wak e comportacion di nos mesun hendenan pa full e periodo aki cu ta na caminda”, el a sigura.

Di loke ta trata e situacion di fin di siman na unda un tiramento a tuma luga na Noord, Tjon Kock a manifesta cu no tabata trata di un arma di candela pero e daño cu e arma ta causa no solamente den establecimento pero den comunidad ta hopi grandi y eynan e comunidad no ta bay sinti sigur.

Tambe el a enfatisa cu tur loke ta trata delitonan di violencia, caminda cu tin posicion di arma tin prioridad igualmente cu atraco cu tambe tin prioridad y den caso aki ultimo tempo ta wordo confronta cu hopi tiramento cu a causa bida di hopi hoben.

“Actualmente pa loke tin di haber cu investigacion, tur e casonan aki a wordo resolvi pero, esey no ta nifica cu tin un problema”, el a bisa.

Na e momentonan aki nan ta identificando e problema cu tin den e hobennan cu ta causando e tipo di delitonan aki of cu ta bira e victima, pero tambe pa wak e trayectorio di nan y haya sa kico ta su situacion.

D loke ta trata e cantidad di armanan di candela y di na unda nan ta bin, Tjon Kock a expresa cu segun informacion cu nan ta ricibi na base di casonan e mayoria di bes tambe mirando e distancia cortico cu tin entre Aruba y Venezuela, nan tin expectativa cu e armanan ta drenta via e banda ey.