(TMZ) – Prins William ta bisa cu e ta “completamente indigna” cu e hungadonan di e ekipo di England color scur a ricibi abuso racista riba diadomingo, yamando e comentarionan “completamente inaceptabel.”
Racistanan a comenta palabranan menos bunita pa Jadon Sancho, Marcus Rashford y Bukayo Saka, ken tabata personanan color scur, despues cu nan a faya nan tiro di penalty durante e final di e campeonato Euro Cup 2020 contra italia. Y e no ta tuma hopi pa Prins William sali na nan defensa.
E prins di 39 aña, a publica un declaracion riba medio social skirbiendo “e ta totalmente inaceptabel cu hungadonan mester wanta e trato abusivo aki. E mester stop aworaki y tur esunnan envolvi mester ser considera responsabel.”
William su palabranan ta hopi comendabel, mirando cu e abuso racista cu e hungadonan a ricibi a cuminsa cu palabranan menos bunita te hasta menasanan contra nan bida, cual a ricibi hopi critica di e observadornan.
Algun riba medionan social a comenta dicon William no a haci un comentario of publicacion similar ora cu Meghan Markel a conta Oprah anteriormente e aña aki cu e tabata victima di abuso racista di e miembronan di e famia real.
E oficialnan di England tambe a condena e racismo cu nan hungadonan tabata experenciando, bisando cu nan ta “disgusta” y “asombra” cu tur esaki.
“Nos ta hopi disgusta cu algun di nos ekipo, kendenan a entrega tur nan esfuerso pa por participa den e torneo aki, ta victima di discriminacion y abuso online despues di e wega di awe nochi” e ekipo a declara
“Nos ta para cu nos hungadonan.”
