(NLTimes) – Minister encarga di Seguridad y Husticia, Ferdinand Grapperhaus a entrega un propuesta legislativo pa haci doxing – revela datonan personal di otro persona pa spanta of intimida nan – un ofensa castigabel. Segun e minister, doxing a bira algo demasiado facil cu e ascenso di internet y rednan social, y ta ora pa hacie mas facil pa combati e tipo di menasa aki.
“E gran facilidad cu cual algun persona ta kere cu nan por intimida door di plama informacion personal di otronan ta mas cu indignante. E ta crusa un linea di loke ta permiti na momento cu ta stroba hende den nan bida, nos agentenan policial ta stroba den nan trabao, y cientificonan no por papia libremente mas”, Grapperhaus a bisa. “Famianan henter no ta sinti sigur mas na cas, hende no ta tribi di sali y ta nan mes.”
Cantidad di comportamentonan intimidante, manera menasa y acoso ya ta castigabel pa ley. Pero den practica, hopi biaha no por enhuicia doxing pasobra no tin un menasa expresa of un invasion sistematico di e privacidad di e persona en cuestion. E legislacion di Grapperhaus tin como meta pa cambia esaki.
“Esaki realmente ta crusa un linea y nos mester registra esaki mas claramente den ley”, el a bisa.
Segun e propuesta, esnan haya culpabel di doxing por enfrenta hasta un aña di prison. Esaki pa comparti datonan personal riba internet cu intencion di intimida of causa problemanan serio pa otro persona, of pa stroba nan den cumplimento di nan debernan of profesion.
E propuesta ta inclui un excepcion pa periodistanan y whistleblowernan revelando datonan den interes publico, ya cu e intencion di e revelacion aki no ta pa intimida otronan sino pa revela hecho y abusonan nobo.
