Ayera mainta den un conferencia di prensa, CEO di Aruba Tourism Authority Ronnella Croes a trece dilanti informacion di loke ta trata e recuperacion turistico di Aruba te luna di juni y ademas e grado di ocupacion di hotelnan.

Na prome instante, el a informa cu luna di juni a registra 84.592 bishitante na unda el a compara e luna di juni aki cu juni na 2019 cu ta considera cu ta e ultimo aña normal pa turismo, na unda el a haya un grado di recuperacion di 85% compara cu juni 2019.

E grado di recuperacion mensual ta uno cu ta sigui bay ariba y si tuma nota y compara di januari te cu juni di e aña aki cu tabata na 33% el a yega te 85%.

Mercado Mericano a recupera na 98%, segun loke Croes a afirma y cu esaki ta moviendo y ta sigui move mas lihe cu e otro mercadonan aunke nan tambe a habri pa mercado Latino Americano y Europeo cu manera el a sigura, nan ta moviendo den mesun direccion aki cu por permiti nan residentenan pa biaha tambe.

“Esaki ta diferencia pa region, unda cu Latino America ta moviendo mas lento y Europa tambe pa diferente mercado pero no pa e mercado primario, ainda tin e situacion di medidanan cu a wordo anuncia pa Gobierno Hulandes diabierna ultimo, ainda esunnan cu tin deseo di biaha for di Hulanda por haci esaki teniendo na cuenta e nivel di riesgo di e pais cu ta bishita”, tambe el a enfatisa cu esaki no a cambia pa Aruba, mirando cu Aruba ta un luga cu ta faborabel pa nan bishita.

E prome seis luna di aña 2021 Aruba a ricibi un total di 326.387 bishitante loke ta nifica den grado di recuperacion di 57% compara cu e prome mita di aña 2019.

Pa e segundo mita di aña nan ta premira cu lo sigui cu un proyeccion di cera aña cu un grado di recuperacion di 76% compara cu aña 2019.

Di mesun manera, Croes a menciona cu AHATA tambe a saca su resultadonan ayera mainta y nan a comparti esey cu nan socionan caminda cu AHATA pa loke ta trata henter e aña aki y na unda nan ta aworaki, nan ta indica cu e grado di ocupacion pa hotelnan pa e aña aki por ta na 57% y esey ta nifica cu a recupera 67% di lo cual e grado di ocupacion tabata na 2019.

Luna di juni tambe ta e luna na unda turismo crucero a cuminsa yega back na Aruba y di esaki Croes a bisa cu manera a keda conoci esaki ta un apertura hopi gradual na unda a ricibi un total di 3 barco cu un total di 1.580 bishitante, esaki ta un 98% – compara cu luna di juni di aña 2019.

“Ta keda subraya cu ta un proceso gradual y cu adelanto na luna di juli pero esey lo wordo anuncia debidamente” el a finalisa.