Aruba lo cuminsa acepta prueba di vacunacion en bes di test PCR pa residentenan di Merca

CEO di Aruba Tourism Authority Ronnella Croes ayera mainta tambe splica tocante e continuacion di flexibilisacion pa esunnan cu ta bishita Aruba for di Merca.

Akinan, el a menciona cu no solamente ta trata di situacion di mercadonan sino cu tambe nan ta tene na cuenta cu e mesun situacion di Aruba, ta importante pa sigui cana e caminda cu tin aworaki localmente pa loke ta trata e maneho di e virus.

Un di e aspectonan importante cu Croes a menciona ta e maneho di entrada pa bishitantenan cu ta dicidi di bin cu vakantie na Aruba, el a bisa cu esaki ta basta estringente y cu nan a mantene asina tambe, pero nan ta reconoce cu aworaki esunnan cu ta full vacuna contra Covid-19 lo por pasa den cierto cambionan cu ta nifica un beneficio pa nan.

Ta p’esey cu entrante mañan 14 di juli Aruba lo cuminsa acepta prueba di vacunacion en bes di test PCR pa residentenan di Merca loke ta nifica un prome paso y nan lo sigui traha riba otro pasonan pa asina habri esey mas.

Pa esunnan cu no tin un ‘Smart Health Card’ cu ta lo cual Aruba ta rekeri di e residentenan di Merca pero e turista ta full vacuna, ainda e por bishita Aruba y tin cu presenta su resultado di test PCR negativo conforme e maneho actual.

“Aruba ta sigui habri pa tur esunnan cu kier bishita for di Merca y tur otro pais tambe, pero pa esunnan full vacuna tin diferente aspecto cu nan mester tene na cuenta cune”, Croes a declara.

Di esunnan cu ta bin na remarca pa por presenta e prueba di vacunacion cu ta bin for di Merca y ta residencia na Merca, ta esunnan cu a ricibi e vacunanan cu ta autorisa pa Food and Drug Administration (FDA) na Merca of autorisa pa European Medicines Agency (EMA) na Europa y na mesun momento pa esunnan cu a vacuna cu Pfizer, Moderna, AstraZeneca of Johnson&Johnson.

Esakinan ta e vacunanan cu Aruba ta acepta conforme e organisacionnan cu a menciona caba y tambe nan ta carga e cello di aprobacion di e organisacionnan aki, aparte di esey, e persona lo mester ta vacuna 14 dia prome cu e biahe y pa completa e proceso aki mester tin e Smart Health Card.

Pa aclaria, esaki no tin relacion cu residentenan di Aruba cu ta regresa for di Merca of cu kier haci un biahe pa Merca, eynan mester tene na cuenta cu lo cual Merca ta rekeri y den caso di Aruba si e persona ta full vacuna por presenta su prueba di vacunacion cu ta haya na Aruba Health App.

Smart Health Card pa Mericanonan ta wordo obteni pa esunnan cu a vacuna na cualkier Wallmart y na Sam’s Club Pharmacy, pa estadonan di California y Louisiana Smart Health Card ta obtenibel na e luga na unda e persona a vacuna.

Smart Health Card lo mester carga y poni riba e plataforma di Common Pass loke ta uni dos paso den e proceso, e prome ta cu e turista mester tin su Smart Health Card y e di dos ta cu e tin cu download e aplicacion di Common Pass y coloca tur e informacion rekeri.

E ultimo paso, ta ora nan ta haya e Common Pass ID of codigo na unda mester coloca riba e plataforma di Inmigracion di Aruba.

Esaki ta nifica cu Aruba ta reconoce cu e persona ta full vacuna y e validez tambe di Smart Health Card na unda e persona no tin mester di bay haci e test PCR negativo prome cu lo yega Aruba of ora ta yega na aeropuerto.

Palabracionnan ta tumando luga pa acepta otro plataforma no solamente di Merca sino tambe di Europa aparte di Smart Health Card unda cu segun Croes a sigura cu tin desaroyonan tambe unda ta papia di Digital Covid Certificate, “asina cu nos keda cla cu esakinan nos lo anuncia debidamente”, el a expresa.