Pa prome biaha Aruba lo tin e Plan di Ordenanza Teritorial cu regla cu ta conta pa tur ciudadano. E ROPv manera e ta conoci (Ruimtelijk Ontwikkelingsplan met voorschriften) a keda presenta na Parlamento segun un proposicion di decreto nacional dos siman prome cu eleccion 2021 na Juni. Y e proceso legal ta encera cu si no tin obhecion di Parlamento, e ley ta acepta y unicamente ta pendiente e firma di Gobernador.

Te cu asina leu cu Bon Dia Aruba por a saca afo, ningun Parlamentario a entrega un obhecion cu ta nifica cu de facto a acepta e proposicion di decreto nacional ROPv cu ta regla e intencionnan di maneho special di Pais Aruba, mara den e ROP di 2019.

E ROPv ta contene regla cu tin di haber cu destinacion, construccion y uso di areanan designa pa e Plan di Ordenansa Teritorial, ROP. Prome cu por a yega na e ROPv tabatin diferente sesion publico unda organisacionnan y hasta individuonan por a duna nan punto di bista.

Comentario Raad van Advies

Raad van Advies den su comentario a bisa cu e proposicion di e ROPv ta mishi diferente tereno di maneho cu ta cay bao diferente Ministerio. Por ehempel e destinacion centro di Oranjestad ta inclui reglanan pa proteha e construccion original y autentico cu tin balor cultural historico grandi, particularmente Rancho y Wilhelminastraat. Como tal minister di Cultura ta encarga cu e aspecto aki y pa por cumpli cu e Ley di Monumento mester bon acoplacion cu otro Ministerio, mirando cu tin reglanan specifico ora ta trata di construccion of ora cu finalmente toch mester basha edificionan historico abao.

Raad van Advies ademas ta mustra cu pa cada peticion mester tene cuenta cu e concepto Build with Nature, BwN, cu tin como meta pa harmonisa mantencion di areanan natural cu desaroyo special. Consecuentemente mester tin un bon cooperacion entre tur e departamentonan publico concerni, particularmente DIP, DOW, Kadaster (encarga cu midimento di tereno) y Direccion di Naturalesa y Medio Ambiente,DNM. Pero banda di e departamentonan publico, tambe mester tin envolvimento di Fundacion Parke Nacional Aruba ora cu tin cualkier desaroyo den areanan cu ta considera areanan natural den e ROP.

Formato di consulta

Den e splicacion di e ley ta mustra cu lo tin un asina yama ‘Omgevingstafel’, cu ta un procedura di reunion unda representantenan di e departamentonan menciona, ademas cu un representante di e Comision Turismo, Comision Vivienda popular, Comision Economia y Comision Sostenibilidad cada uno lo mester bay de acuerdo riba e plannan. Pero Raad van Advies ta bisa cu e no ta hopi cla con desaroyo y planificacion cu e proposicion nobo di maneho lo keda discuti den e formato aki y si FPNA ta envolvi. Como tal ta kere cu e mester keda miho splica.

Implementacion

Supervision y mantencion di e maneho de acuerdo cu e ROPv ta rekeri esfuerso di varios departamento publico y organisacionnan. Tin cierto area ora ta kibra cu e reglanan di ROPv, cu ta autoridad ta cay bao di un otro Minister cu no ta esun di Infrastructura. Ademas, tin caso cu no tur ora ta cay den e ambito penal, sino administrativo. Pero e splicacion di e ley no ta pone mucho atencion na e aspectonan aki, ni na e forma con por tin un supervision y mantencion di ley, incluso e coordinacion rekeri, mas efectivo posibel. Pa tal motibo mes Raad van Advies ta haya necesario pa amplia den e splicacion con e diferente Ministerionan, departamentonan publico, organisacionnan y manehadonan ta duna forma na e trabao di supervisa y mantene e reglanan, pa asina evita cu e ta fragmenta, of cu mas departamento ta haci e mesun trabao di control.

Por ehempel, benta sushi afo unda cu ta, ta un infraccion segun articulo 4.5, seccion f di e ROPv. Pero e ta un infraccion tambe segun articulo 29, inciso 1, seccion b di e APV, Algemene Politieverordening (ley di Polis) cu di otro banda ta cay bao responsabilidad di Minister di Husticia. Raad van Advies ta opina cu mester determina cuanto capacidad tin disponibel y con ta aplica esakinan.

Mas ainda, Raad van Advies ta urgi pa pone atencion na e pregunta si e hecho cu no a percura den e ROP pa areanan natural y area di marino ta pega na otro no ta stroba un maneho efectivo riba proteccion di e flora y fauna presente den e areanan aki.

Banda di tur esaki, Raad van Advies ta puntra atencion pa e consecuencianan financiero di e proposicion, particularmente pasobra e intencion ta pa introduci e ROPv cu programanan informacion y educativo, particularmente debi cu DNM lo mester acerca gruponan specifico pa cera conoci y aplica nan mes e concepto di BwN.

Ta bisa den e nota di maneho cu ta bay mehora capacidad di mantencion entre otro pa medio di mas ‘buitengewoon opsporingsambtenaar,’ BOA’s y un plataforma digital dedica na e concepto di BwN, unda entre otro ta splica kico tur mester tene cuenta cune prome cu rosa tereno, kap mata y prepara tereno pa construccion. Pero e splicacion legal no ta inclui kico ta e gastonan mara na e proposicion aki, cu tin como meta pa facilita e ROPv y como tal no ta cumpli cu e articulo 6, prome inciso di e Ley di Comptabilidad. Pa tal motibo Raad van Advies ta urgi na Gobierno pa amplia e splicacion di e ROPv cu un capitulo financiero.

Criteria DOW

Segun e ROPv, DOW ta encarga cu e planificacion di edificionan banda di camindanan y Raad van Advies a tuma nota cu a haci uso di terminonan cu ta conoci na Hulanda, pero no ta cla si a tene cuenta cu diferencianan entre un caminda den un bisindario, caminda den un bario of un caya residencial. Como tal, Raad van Advies ta haya importante pa por splica cua ta e criteria cu DOW lo bay usa pa su evaluacionnan.

11.300 versus 13.100

A establece un norma di e maximo di acomodacion permiti na Aruba. Esaki ta 11.300 camber di hotel, cu ta encera cu den e proximo cinco añanan, Aruba lo por conoce maximalmente 2000 camber di hotel adicional. Na e momentonan aki tin 11.100 acomodacion, cu ta inclui 8800 camber di hotel mas 2300 otro tipo di camber di estadia. Si mester permiti 2000 camber di hotel adicional, e lo surpasa e norma di 11.300 camber, segun Raad van Advies. “Kizas aki a haci un fout den e texto, y cu realmente e maximo lo mester ta 13.100 camber. Y si no ta un fout den texto, anto mester splica con a yega na e calculacion di e cantidad maximo,” e organo consultativo a bisa den su observacion.

Casnan como facilidad di hospedahe mester permiso

Pero, locual ta necesario ta pa splica cuanto permiso pa camber di hotel a duna te cu awor basa riba e ley di permiso. E ROPv ta bisa tambe cu por usa casnan como facilidad di hospedahe pa maximo 90 dia, y cu den un caso cu ta haci cuanto cas of apartamento ta permiti pa usa 90 dia pa aṅa of mas pa facilidad di hospedahe. Cualkier facilidad cu ta cobra pa hospedahe, sea tin servicio of no, mester di permiso. Raad van Advies ta haya cu no ta cla si e permiso ta pa un solo biaha of den general y si ta controla si ta surpasa e 90 dianan maximo. E pregunta ta con ta bay controla e 90 dianan aki.

Bon Dia Aruba lo amplia riba e observacionnan di Raad van Advies riba e ley aki, cu entre otro ta regla e ora di ciere pa tiendanan cu ta opera den areanan residencial.