(EFE) – Autoridadnan Colombiano cu ta yuda den investigacion di e asesinato di e presidente di Haiti, Jovenel Moise, dialuna ultimo a confirma cu e hefe di seguridad di e palacio presidencial na Puerto Principe, Dimitri Herard, e aña aki a haci varios biahe na Colombia y otro paisnan Latino Americano cu fin desconoci.
“Nos tin conocemento a traves di ekipo di trabou di Interpol na Colombia cu e comisario Dimitri Herard, hefe di unidad di seguridad general di Palacio Nacional di Haiti, a realisa biahenan na Ecuador, Panama y Republica Dominicana utilisando Colombia como transito”, e director di Polis Colombiano, general Jorge Luis Vargas a bisa den un conferencia di prensa.
E oficial a agrega cu nan ta purba di descubri “ki actividadnan e comisario Dimitri tabata haci den e biahenan aki pa teritorio Colombiano” na unda 21 militar retira presuntamente tin vinculo cu e magnicidio, y pa e rason aki a pidi, “na e paisnan aki, na unda e persona aki a bay pa contesta nos e pregunta aki”.
E presidente Moise a wordo asesina diaranson di siman pasa na un asalto den su cas ubica na bario di Pelerin di Puerto Principe, na unda tambe su casa, e prome dama a keda herida y aworaki e ta ricibiendo cuido medico na Merca.
General Vargas a laga cla cu e investigacion ta den man di autoridadnan Haitiano y cu e labor di Colombia ta di acompañamento y colaboracion.
“E investigacion pa homicidio di e presidente di Haiti ta den man di autoridadnan hudicial di Haiti. Colombia ta coopera den loke nan mester; e aparato hudicial Haitiano ta independiente y autonomo”, e oficial a sigura den un conferencia di prensa den e cual e minister di Defensa Diego Molano tambe tabata presente.
