(CiberCuba) – Diadomingo pasa protestanan masivo den henter pais a cay como un sorpresa pa tanto e regimen como pa coresponsalnan stranhero. Pa promer biaha den mas di 30 aña pueblo a subi caya, harta di e situacion economico, di escasez grandi di cuminda y medicamento, empeora pa e situacion di salud, cu e crisis di Covid-19 saliendo for di man. Banda di protesta contra escasez y coronavirus, tabata remarcable e gritonan pa libertad entre e manifestantenan.
Regimen di promer mandatario Miguel Diaz-Canel no a perde pa gana y a desconecta internet den varios parti di e pais, pa evita cu informacion tocante e protestanan por yega na resto di pais y pa reduci e posibilidad di por organiza mas manifestacion. Asina mes via rednan social e informacion a cuminza penetra den medionan internacional. Banda di esey Diaz-Canel a haci un yamado na tur militante y miembro di partido comunista pa tambe subi caya pa combati e protestanan. Tambe a activa e cuerpo di represion conoci como “Boinas Negras” cu a captura un cantidad no conoci ainda di manifestante.
Manera tabata di anticipa, presidente Diaz-Canel a culpa embargo di Merca pa e protestanan di diadomingo. Durante su rueda di prensa dialuna mainta e mandatario a reitera interes di su gobierno pa soluciona e crisis di e embargo y a critica Cas Blanco pa ta ehecuta politica cu ta afecta pueblo Cubano directamente.
El a referi na e supuesto campañanan di destabilizacion cu ta ehecutando desde Washington pa caba cu e regimen Castrista y a urgi pa lanta e restriccionnan cu ta impedi su gobierno acceso na mercado internacional. Mientras tanto, e crisis di Covid-19 a yega na e punto mas halto desde inicio na 2020, cu mas di 6.000 caso nobo pa dia y mas di 30.000 caso activo.
